همدان ایالتینین آشیقلاری و بؤلگه‌نین آشیق صنعتین‌دن بحث ائد‌ن «بردستانی الوند» کیتابی ایشیق اوزو گؤروب.

آخار. آذ خبر وئریر کی، کیتابین مؤلفی قادیر شهسواری اوزون ایللر گنج آشیقلار اوزرین‌ده آراشدیرما آپاردیق‌دان سونرا بئله بیر اثر یارادیب. کیتاب «سوره» نشریاتی طرفین‌دن نشر اولونوب.

قادیر شهسواری کیتابین مقدمه‌سین‌ده آشیق صنعتینی تورک ادبیاتی، تاریخی و مدنیتینین قیمتلی میراثی کیمی دیرلندیریب. او قید ائدیب کی، اثری یازماق‌دان مقصد دیگر منطقه‌لرله اوخشارلیق و فرقینی نظره آلاراق همدانین تورک موسیقی‌سینین تاریخینه ایشاره ائتمک و بو قیمتلی خزینه‌نی قورویوب ساخلاماقدیر.

کیتابین سونون‌دا همدان آشیقلارینین ایفا ائتدیی ۳۰ آشیق ماهنی‌سی درج اولونوب، بو حیصه کیتابین دیرینی داها دا آرتیریب.

دده حیدر، اوستاد حقرضا فیطری، ماشاللاه رسام، امیر فراهانی، فرج الله خوشقیافه، خودایار الیار و داها بیر نئچه اوستاد ساز-سؤز آدامی همدان ایالتینین مشهور آشیقلارین‌دان ساییلیر. اونلارین اکثریتی یاشلانسا دا یئنه ده آشیق صنعتینی اینکیشاف ائتدیرمک اوچون اللرین‌دن گلنی ائدیرلر.