شک ائله میین ایسلام جمهوریتی آدینا قورولان عدلیه
سیستمینده بیر سیرا مسئول لار، آزربایجان میلی حرکت آدینا چالیشقانلاری آغیر و عدالتسیز حکملرله سارسیدیب سوسدورماق، قرارینا گلیبلر.

آزربایجان میلی حرکتی یاخود تورک هویت چیلیگی آدینا چالیشقانلار، بو سایاق ناجوانمرد سیاستلرله نه سارسیلار نه سوسار، بلکه داها آرتیق اودلانیب داغیدیجی بیر ولکانا دونر نهایت.

بو همان سونوجدور کی، بئله بیرسیاستی ایسلام جمهوریتینه اونری وئرنلر، آرخاسی جادیلار.

ایسلام جمهوریتی ایله میلیتار گوجلرینین دورشماسی، گونو گوندن داها آرتیق سرت لشیر. وضعیت دونمز حالا چاتیب دونماقدادیر. یالنیز اودلی آلوولی بیر ساواشین آتشی بو دورومون بوزلارین اریته بیلر.

بئله بیر آلوولی آتشه هئچ طرفین حاضیرلیغی یوخدور.
حاضیرلانماق لازیمدیر.

دونیا گوجلری یاخجی بیلیرلر، ایسلام جمهوریتی ایله احتمالی ساواشلاریندا، آزربایجان میلی حرکتی کیمسه یه نسنه اولمایاجاق. بلکه ده کورد مسئله سینه گوره میلی حرکت ایسلام جمهوریتی ایله بیرلشیم بیرحالدا، موقع توتا بیلدی.

اونا گوره ساواش آچیلمادان ایسلام جمهوریتی ایله میلی حرکت آراسیندا اولان ایختیلافلار، دوشمانچیلیغا چئوریلملیدیر. بو دوشمانچیلیق هر ایکی طرفی ضعیف لندیره بیلر.

بو آرادا تکجه دونیا میلیتار گوجلری کی (البته پان فارس تشکیلاتلارلا ایندیدن بیرلشیبلر) فایدالاناجاقلار.
آزربایجان میلی حرکت چالیشقانلاری بو سیاستی درک ائده رک، دونیا گوجلرینین اوجاغینا اودون اولماسین دییه، ایسلام جمهوریتی ایله دوروشماقدان، بیله رک چکینیرلر. اوسته لیک چالیشیرلار ایسلامیت له پان فارسیسم آراسیندا فرق آچسینلار. مدنی یول لارلا ایسلام جمهوریتی مسئول لارینا، پان فارس دوشونجه سین آیدینلاتماغا چالیشیرلار.

نه ایسه بو دورومدا ایسلام جمهوریت مسئول لاری، اوزه ل اولاراق عدلیه قوه سینده ایمضا صاحیبلری، بیلمه لیدیرلر، آزربایجان میلی حرکت چالیشقانلارینا عدالتسیز حکم لر وئرمک، دونیا میلیتار گوجلرینین توزاغینا دوشمک دیر. اولار ایستیرلر منطقه نین ان گوجلو مردمی قوه سین یعنی آزربایجان میلی حرکتین، حکومتله دورشماغا یونتسینلر. البته میلی حرکت چالیشیر بو توزاغا دوشمه سین. ایسلام جمهوریتی ده بو توزاغا سالینمامالیدیر.

منجه ایسلام جمهوریتی مسئوللاری بیرداها دوشونملیدیرلر. بیرحالدا کی میلی حرکت چالیشقانلاری حتی ان سرت اعتراضلارین دا، مدنی شکیلده بللندیریرلر، اوسته لیک بو اعتراضلارین ایسلام حاکمیتی علیهینه یوخ بلکه پان فارس سیستمی علیهینه یونلندیریرلر، ندن بو عدالتسیز حکم لر آزربایجان میلی حرکت چالیشقانلاری علیهینه صادیر اولور؟
یوخاریدا اوتورانلار نفوذی اللرین ایزلیرن بو حکملرین صادیر اولماسیندا نجور رصد ائلیرلر؟

منطقه نین بو دوروموندا میلی حرکت ایله بو نوع داورانماق هئچ بیر سیاسی عقلانیت له اویقون گورونمور. بیر داها ات داش ائلمک لازیمدی.

(حسن ارک) ۹۸/۴/۲۲.