ایرانین کاشان شهرین‌ده یئرلشه‌ن باغدیر. مشهور فین حمامی دا بو باغ‌دا یئرلشیر. ادعالارا گؤره، ناسیرددین شاه قاجار اؤز دؤولتینین باش ناظری اولان امیر کبیری ۱۸۵۲-جی ایلده بو باغ‌دا اؤلدوروب. اراضی‌سی ۲۲ مین کوادرات مئتردن آرتیق اولان باغ آذربایجان صفویلر دؤولتی دؤورون‌ده سالینمیش‌دیر. مرکزی حیصه‌ده دیوارلار، ایستئحکام تیکی‌لیلری و سیلیندیرشکیل‌لی قالالارلا احاطه اولونان حیط خصوصی دقت چکیر. بو باغ ایرانین اصفهان ویلایتین‌ده یئرلشه‌ن ان چوخ توریست جلب ائد‌ن تاریخی مکان حساب اولونور. بئله کی، ۲۰۱۸-جی ایل نووروز بایرامین‌دا فین باغی ان چوخ توریست جلب ائد‌ن تاریخی مکان اولموش‌دور.

فین باغی ۲۳ نویابر ۱۹۳۵-جی ایلده ۲۳۸ سایلی قئیدیات نمره‌سی ایله ایرانین یئرلی اهمیت‌لی تاریخی معمارلیق عابده‌سی کیمی قئیدیاتا آلینمیش‌دیر. ائل‌جه ده بیر نئچه ایل اؤنجه یونئسکونون عمومدونیا مد‌نی ارث سیاهی‌سینا سالینمیشدیر.

بعضی منبع‌لرده باغی تاریخی بووئیهیلر سلاله‌سینین حاکمیتی دؤورون‌دن باشلادیغینی قید ائدیرلر. بو منبع‌لر فیکیرلرینی اساسلان‌دیرماق اوچون ۱۵۷۳-جو ایلده باغین تامامیله داغیلماسینا سبب اولان گوج‌لو زلز‌له‌یه ایشاره ائدیرلر. بو منبع‌لرده قید ائدیلیر کی، کؤهنه باغین خارابالیقلاری یئنی باغین بیر نئچه یوز مئترلیین‌ده یئرلشیر و «قدیم باغ» آدی ایله مشهوردور. قدیم باغ ان چوخ الخانیلر دؤولتینین حاکمیت دؤورون‌ده گئنیشلندیریلمیش‌دیر. باغ‌دا یئرلشه‌ن تیکیلینین ۱-جی شاه عباس طرفین‌دن قیاس الدین جمشید کاشانینین لاییحه‌سی اساسین‌دا تیکیلدیی قبول ائدیلیر. لاکین آکادمیک قایناقلار لاییحه مؤلفینین شئیخ بهایی اولدوغونو قید ائدیرلر.

باغین گئنیشلندیریلمه‌سی و قوروجولوق ایشلری ۱-جی شاه صفی و ۲-جی شاه عباس دؤورون‌ده ده داوام ائتمیش و کولمیناسییا نقطه‌سینه چاتمیش‌دیر. گیریش پورتالین اوزرین‌ده یئرلش‌ن تیکی‌لیلر، صفویلره مخصوص یای ائوی و حماملاردان بیری قئید ائدیله‌ن دؤورده تیکیلمیش‌دیر. صفویلر دؤولتینین حاکمیتینین سون ایللریندن زندلر سولاله‌سینین حاکمیتینه قدر اولان دؤورده، افقان و نادیر شاهین هوجوملاری ایله عینی زامان‌دا باغ دقت مرکزین‌ده کناردا قالمیش‌دیر. کریم خان زندین حاکمیتی دؤورون‌ده آرد-آردا بیر نئچه زلز‌له‌نین باش وئرمه‌سین‌دن سونرا باغ و کومپلئکسه داخیل اولان بینالار رئستووراسییا اولونموش و «کریم خانین استراحت اوتاغی» تیکیله‌رک کومپلئکسه داخیل ائدیلمیش‌دیر.

فتحعلی شاه قاجارین حاکمیتی ایللرین‌ده بیر چوخ عابده‌لر تیکیله‌رک، کومپلئک‌سه علاوه ائدیلمیش‌دیر. بو گون کومپلئک‌سه داخیل اولان دیگر عابده‌لرین هامی‌سی بو دؤورون محصولودور. لاکین فتحعلی شاهین اؤلومو ایله باغا قارشی لاقئیدلیک حؤکم سورموش و بیر حیصه‌سی محو اولموش‌دور.

پهلویلرین حاکمیتی دؤورون‌ده باغ کومپلئک‌سینه خصوصی دقت آیریلمیش، «نیظام الدین خلوتخاناسی»نین خارابالیقلارینین یئرین‌ده ایران میللی موزئیینین بیناسی، ائل‌جه ده کیتابخانا و حماملار آراسین‌دا یئنی تیکیلی تیکیلمیش، بیر چوخ عابده‌لرین اوزرین‌ده ایسه یئنی‌دنقورما ایشلری آپاریلمیش‌دیر. سون دؤورلرده ده کومپلئکسه قارشی دقت‌سیزلیک اونون بعضی حیصه‌لرینین یارارسیز حالا دوشمه‌سینه سبب اولموش‌دور.