آنا صحیفه کولت |
ایستکلی یئمک و یئمکبیشیرمه هوسکارلاری، بو گون سیزه عثمانلی سارای مطبخیندن بیر شیرنیات نؤوونو تقدیم ائدیریک. بیسکویتلی پیروقون اوزرینه شربت تؤکولهرک حاضرلانان بو شیرنیاتین آدی روانیدیر (رئوانی). بو، عثمانلی سارای مطبخیندن بعضی یئمکلر کیمی تاریخین توزلو رفلرینده اونودولموش بیر شیرنیات دئییل، هله ده ائولرده، رستورانلاردا حاضرلانیر و لذتله یئییلیر.
روانینین یارانماسی ایله باغلی گئنیش یاییلمیش بیر روایت وار. ۱۷-جی عصرده عثمانلی سلطانی ۴-جو موراد آذربایجانین ایروان شهرینی توتور. سارای آشپازلاری بو غلبهنی قید ائتمک اوچون او گونه قدر هئچ گؤرونممیش بیر شیرنیات اویدورورلار، آدینی دا ائله ایروانین آدیندان گؤتورهرک «روانی» قویورلار. عثمانلی مطبخیندن یادیگار قالان بو روانی تورکییهنین بعضی بؤلگهلرینده "سونگئر تاتلیسی" و یا "یوغورت تاتلیسی" اولاراق دا تانینیر.
روانی شیرنیاتینی حاضرلاماق اوچون نلر لازیمدیر، اولجه اونلاری سادالایاق:
۴ عدد یومورتا،
۱ ایستکان شکر توزو،
۱ ایستکان قاتیق،
۱ ایستکان مایع یاغ،
۱ ایستکان ماننا (ایرمیک)،
۲ ایستکان اون،
۱ پاکئت قابارتما توزو (دروژ)،
۱ عدد لیمونون رندلنمیش قابیغی،
۴ ایستکان شکر توزو،
۵ ایستکان سو،
یاریم (½) ایستکان لیمون سویو،
۲ خؤرک قاشیغی رندلنمیش هیند قوزو،
و بیر آز وانیل.
روانی شیرنیاتی اوچون اولجه شربتی حاضرلاماق لازیمدیر. بونون اوچون شکر توزو و سویو بیر قازانا تؤکون، ضعیف اوددا تخمیناً ۳۰ دقیقه بیشیردیکدن سونرا لیمون سویونو علاوه ائدین، و کنارا قویون کی، ایلیقلاشسین. داها سونرا یومورتا و شکر توزونو، شکر تام حل اولانا قدر یومورتا ایله چالین. سیرا ایله مایع یاغ، قاتیق، وانیل، رندلنمیش لیمون قابیغی، ماننا، اون و قابارتما توزونو علاوه ائدیب چالماغا داوام ائدین. بوندان سونرا سوبا تاواسینی کره ایله یاغلایین و خمیری قابا تؤکون. اولدن ایسیدیلمیش ۱۸۰ درجه سوبادا قاریشیغی بیشیرین. یاریم ساعت سونرا سوبادان بیسکویتی چیخاریب اوستونه سویوموش شربتی تؤکون. کیک شربتی تام اؤزونه چکدیکدن سونرا دیلیملرین و اوزرینی رندلنمیش هیند قوزو ایله بزیین، سوفرهیه گتیرین. نوش اولسون.
تاریخ
2019.08.13 / 12:29
|
مولف
آینورا مممدووا
|