سورقو: فارس تحصیل سیستیمی مدرسه لرینده تورک اوشاقلاری ایستدیکلری ناغیلی، یوخسا مطلبی آنادیللرینده یازاراق اونو فارسچایا چئویرسه لر، بیر فارس اوشاغی کیمی باشاریلی اولابیلرلر می؟

جواب: هر بیر دیله ترجمه ائتمک، او دیل، ائله جه ده او دیل منصوب اولدوغو مدنیت اوچون خدمت ساییلار. بو باخیمدان اوشاقلاریمیزی فارسچایا ترجمه ائتمگه تشویق ائتمک بیله فارسلیغا خدمت ساییلار. باشقا بیر مسئله، هر دیلین اؤز منطیغی اولدوغو اوچون تورکچه-دن فارسچا چئوریله جک اثر بیله باشاریلی اولماسی اوچون فارس دیلی منطیغی و دئییملرینه اویقون بیچیم و شکیلده داشینماق مجبوریتینده اولدوغو اوچون بو عمل ده فارسلیغا بیر خدمت ساییلار. بئله اولدوقدا، اوشاقلاریمیزی اؤز دوشونجه لرینی کاغیذ اوزرینه گتیره رک اونلاری فارسچا چئویرمک دئییل، او دوشونجه لری اؤز دیلیمیزین باشاریغی ایله دیلیمیزه قازانماق دگیشیکلیگی و عوضی اولمایان ایشلردن و خدمتلردن ساییلابیلر.