Axar.az
یوخاری
17 فئورال 2020


تبریز ناموسو - تاریخی رومان - بیرینجی حیصه

آنا صحیفه کولت
12 Punto 14 Punto 16 Punto 18 Punto

کولت. آذ آذربایجانین گؤرکه‌م‌لی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

آلاچیغین اورتاسینداکی میس مانقالین کوزو چوخدان سونموشدو. یالنیز جاناوار گوزو قارالمیش کومورون اوستونده کی کولون کپنک قانادینین توزو کیمی یومشاق اولدوغونو سئچه بیلیردی. عادی بیر هنیرتی کولو قاریشدیرار، آلت- اوست ائدردی.
داها هئچ نه گورونموردو. آلاچیقدا انسان هنیرتیسی حس اولونسا دا، بو او قدر ضعیف و سئزیلمز ایدی کی، مخمر کولون مورگوسونو پوزماغا گوجو چاتمازدی. آیدین ایدی کی، هنیرتی کیشی یه مخصوص دئییلدی. کیشی یاتمیش اولسایدی، خورولتوسو عالمی باشینا گوتورردی..

آلاچیغین تاوانیندا توستو چیخماق اوچون باجا واردی، همین باجادان دا اولدوزلار گورونمه لییدی. هاوا قارانلیق اولدوغوندان باجا ایله گوی بیر-بیرینه قاریشمیشدی.

بیردن هاردانسا، گونشدن، آیدان خبرسیز شیغییان بیر شعاع باجانی آیدینلاشدیردی. شعاع میس مانقالین اوستونده گزدی، پاخیر آتمیش میسین شعاسی دیل چیخاریب، آلاچیغین دیوارلاریندا دولاشدی و اورادا آلاچیغی ساخلایان چوبوقلاری، چوبوقلارین آرخاسینداکی عجائب حیوانلارا اوخشایان ناخیشلاری ایشیقلاندیردی. شعاع گزیر، نه یی ایسه آختاریردی. نهایت، ایپک اوزلو یورغانین آلتیندان بیر باش گوروندو. قاباریق آلماجیق سوموکلری اولان قادینین قارا قاشلاری، سود کیمی آغ صیفتی واردی. سونرا شعاع اونون بویرونده یاتمیش کورپه نین یومرو، قیرمیزییا چالان صیفتینه سانجیلدی، دیکسینمیش اوشاق بیر آن گوزلرین آچیب، تئز یومدو و بالاجا یومروقلارینی گوزلرینین اوستونه سیخیب آغلادی. آنا اوشاغین سسینی یوخودا ائشیتسه ده، آییلمادی. یوخولو-یوخولو اوز اوستونده کی یورغانی کورپه نین اوستونه آتدی و هله اولوشکه ممیش آغ آپپاق دوشلری گوروندو. اونلار ائلین کیمی لنگر ووردو. ایکی بارماغینی بو کونده نین باشینداکی چییه له یه اوخشار دویمه یه آتان آنا اونو کورپه نین دوداقلارینا اوزاتدی. آما کورپه سسینی کسدیییندن آنا دوشونو گئری چکدی. ایشیق دوشون آشاغیسینا ائنیب، تن اورتادا دایاندی.

بو زامان قادین یوخو گوروردو. واقعه سینده آلاچیغین باجاسیندان قیرمیزی ساققال، آغ صیفت، ماوی گوز بیر ایگید توللانیب ایچری دوشموشدو و و انون لوت بدنینه طرف گلیردی. قادین یوخودا اونولا چارپیشیر، اوزوندن اوزاقلاشدیرماق ایسته ییر، بو ایسه ممکن اولموردو. ایگید صیفتجه هئچ وجه له سئیرک ساققال دوبون بیانا اوخشامیردی. ساققالی قیرمیزی، گوزلری گوی ایدی. یاناقلاری قایساق باغلاییب، توبولغا آغاجی کیمی سویولموشدو. لاکن نجه ده حرارتلی، نجه ده شیرین، نجه ده اونودولماز بیر گوروش ایدی. هیهات! شیرینلیک بیردن-بیره یوخا چیخدی، قادین سوستالدی،محکم جه ترله دی. گوزلرینی گئنیش آچیب، قارانلیغا باخدی. نه قیرمیزی ساققال لی کیشیدن، نه ده آلاچیقدا گزن شعادان اثر-علامت گوردو. آتلی قولونو قالدیریب، قاشلارینین اوستونه قویدو و حس ائتدی کی، قولو اوشویور. دئمک، آلنینداکی ایستی تری سویوق تر عوض ائتمیشدی. قادین خجالت چکدی. اریندن سونرا یوخودا اولارکن باشینا گلمیش بو احوالاتدان هئچ کس خبردار اولماسادا، اوزو اوتانیردی، اتوکوردو. "بو نه اولان ایشدی، تانری؟"

تاریخ
2020.01.20 / 20:04
مولف
آینورا مممدووا
شرح لر
دیگر خبرلر

شرقین معنا دنیزی - شمس تبریزی

آذربایجانین قدیم خالق رقصی- میرزیی رقصی-ویدئو

تبریز ناموسو- تاریخی رومان-۲۵-جی حیصه

ظابط نبی‌زاده فجر موسیقی فستیوالین‌دا – فوتو

میللتیمیز یارین بیر فلاکته اوغرارسا، سبب قادینلاردیر - رسول‌زاده

آدیمی گووه‌ج قوی، اوجاق اوسته قویما...

ایکی سئودا چکه‌نلرین جزاسی وار - ویدئو

بیر سؤزجویون اؤیکوسو: «خییوو» نه دئمک؟

برگزاری جشنواره موسیقی عاشیقلار در تبریز

قارمونو الین‌دن یئره قویمایان تبریزلی موسیقی‌چی

خبر خطّی
 
Axar.az'da reklam Bağla
Reklam
Bize yazin Bağla