کولت. آذ آذربایجانین گؤرکه‌م‌لی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

کؤچور‌ن آینوره مممدووا

اولی بورادا

آغ ساققاللاردان بیری سوروشاجاق:

قیزیل گول نئجه اولور؟

ایتبورنو چیچه ییندن بئش دفعه بویوک، لاله کیمی قیرمیزی.

بس لاله نئجه اولور؟

قیزیل گولدن بئش دفعه کیچیک، اونون کیمی قیرمیزی.

باش آغ ساققال:

اونون عطیری باهاردا دا گلیرمی؟- سوروشاجاق.

البته، اما اونون عطری قیشدا دا گلیر. اونسوز دا یازدا چوبان یاستیغینین، یایدا یووشانین اییینی تانری اوزو یئتیریب. قیشدا ایسه قیزیلگولون عطرینی من اونا چیله میشم.

قوجالار اوزون مدت دینمه یه جکلر. سونرا ان یاشلی سی دیلله جک:

سنین اوتکوخدان او یاندا تالان ائدیب گتیردیییین قیزیل گول عطری، ایپک، آلتون بیزیم عادتیمیزدن، بیزیم ناموسوموزدان آرتیقمی اولوب؟ سن ان بویوک و مقدس عادتی پوزموسان، خاتونو اوزونله او بیریسی دونیادان بو بیریسی دونیایا گتیرمه می سن.

دوبون ایسه قیشقیراجاق:

اوندا گرک اوشاقلاریمی دا، طایفامی دا گتیریدیم کی، دونیادا بیزیم طایفادان هئچ اثر- علامت ده قالمایایدی.! ایسته دییینیز بودورمو؟
یوخ، او طایفانین سلامتلیغی اوچون بو لازیم ایدی. بیر خاتونلا طایفا قارا گئیینمز، طایفا باشچیسینین اوشاقلارین ایسه آنا نفسی عوضینه قیشین سرت نفسی ایسیتمه لی، آنا سودو عوضینه مادیان سودو قارنیمیزی دویوزدورمالی، نننی عوضینه یهر ییرغالامالیدیر. آتا اولمایاندا آنا حیمایه سینده بویوین اوشاق قیز-قادین خصلتینده اولار، او جور بویوین اوشاق دویوشده کوت قیلینج کیمی بیر شئیدی. حیاتین سرتلییی اونون قیلینجینا اووخار، اوره یینه محکملیک، گوزلرینه کین وئرمه لیدیر. یوخسا او اوز طایفاسیندا باشچی اولا بیلمز و طایفالاری اوزگه چوللرین قوزغونلارینا یئم وئرر.

یئکه نیدونون فیکرینین جیلووونا ائله بیل چکدیلرررر و او، یولونو دییشیب، آیری بیر سمته چاتماغااا باشلادی.

آغ ساققاللارین بو سوزونده بویوک حکمت وار. او اوشاقلاردان طایفایا باشچی، آتالارینا عوض اولا بیلمز. اونلار ائله گوزل آلان-قوانین اوشاقلاری اولوب قالاجاقلار. طایفانی ایسه اداذه ائدن تاپیلار. اونلارین بویوک عمیلری ساغ دئییلمی؟

بیر نئچه ایلدن سونرا، آغ ساققال لارین دئدیی کیمی اوشاقلار حیاتین سرت اوزونو گوروب بویوسه لر، اوندا گور، نه لر اولاجاق!
آلان-قوا سحره یاخین فیکیرلشیردی. اوغلو دا بو گئچه یامان تئز-تئز آغلاییردی و ایندی ده اونون تئزلیکله سودله دولان دوشونوو وار گوجو ایله امیردی. اوشاغین کورپه باشی آناسینین سول قولونون اوستونده ایدی و بیردن ایستی بیر آخینلا بالاسیینین دیلینین اوستونه توکولن سودون عکس استقامتینده ائله بیل سویوق، سرت بیر تیتره ییش یاراندی و اونا ائله گلدی کی، اونو بالاسیندان آییریب، آناسینین یانینا گوندرن خنجر دوشونو دلیب، ایچری کئچدی و اوره یی نین دامارین کسدی.

داوامی وار....