کولت. آذ آذربایجانین گؤرکه‌م‌لی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

اولی بورادا

کؤچور‌ن آینوره مممدووا

ناخچیواندا قصد

هجری تاریخی ایله ۷۱۹ جو ایلین پاییزی ایدی. اوزوم باغلاریندا یارپاقلار سارالیر، بنووشه یی سالخیملار شاختا دیدیکجه قیزمیزی رنگه چالیردی. باغبان هردن سالخیملاری چئویریردی کی، هر طرفینه گون وورسون. بارماقلاری دین گیله لرین توزو سیلینیر، داها دا پاریلتیلی اولوردو. باغبان حسین کیشی یاشدا یئتمیشی حاقلاسا دا، یورولماق نه اولدوغونو بیلمیردی. نئچه ایل ایدی کی، امیر چوبانین باغبانی ایدی، اونون باغیندا ائله نوع اوزوم اولمازدی کی، یئتیشدیرمه سین. هم ده بیلیردی کی، امیر چوبانین بو اوزومدن خوشو گلیر.
سالخیملاری چئویریب قاییتدی. تالوارین آلتیندا یوخ، شیره دن قارالمیش کوتویونون قاباغیندا اوتوروب، اوزونو گونه وئرمه یه باشلادی. بیر آز دینجینی آلیب قالخدی، بویوندوروق قاییشی کیمی ایشلنمکدن قابیق قویموش الینی اوزادیب، اوزون بارماقلارینی سبدین قولپونا کئچیردی. بوستاندان چیخیب، شهرین قالا قاپیسینا طرف گئتدی.

اوزاقدان مسجدلرین مناره لری گورونوردو. مومنه خاطون ترپه سینین کاشیسی زمرد ایشیغی ایله پاریلداییردی.

خبر توتموشدو کی، قوللوق ائله دییی امیر چوبان اوز اوغلو حسنله ائولرینه قاییدیب. اونا گوره ده باغدان اونون یانینا الی بوش گئتمک ایسته مه دی. چوخداندی امیر چوبانی گورمه میشدی.

بیر آتلی کهرین جیلووونو چکیب، حسین کیشینین یانیندا آتینی یاواشیتدی. کیشییه کمال- ادبله سلام وئردی.

آی حسین کیشی، گوزون آیدین اولسون، امیر گلیب، دئدی.

وطندی ده، آی باشینا دونوم. دئییر، گزدیم داغی، آرام، جنت گوردوم بورانی.

چوخداندی گلمیردی. هاردایدی؟

نه تهر گله یدی، آباشینا دونوم، بو بویدا اولکه نین امیر الامراسیدیر. بیر اوجو دربند، بیر طرفی خراسان، بیر طرفی مصر. هر یئرین ده دردی سری اونون بوینوندا. ائله ایندی ده واخت تاپیب گلیبسه بویوک ایشدی.

آتلی دیللندی:

شهرین بوتون باش بیلنلری گوروشونه گلیب. قوردلار محله سینده آدام الیندن ترپنمک ممکن دئییل.

قویمازلار کیشی دینجینی آلسین؟! امیر چوبان تئچه ایللر ایدی کی، ایلخانی ساراییندا مختلف و ظیفه لر توتموش، سرکرده مهارتینی گوسترمیشدی. ایکی ایل ایدی کی، سلطان محمد خدابنده اولکه نین امیرلر امیری وظیفه سینی اونا تاپشیرمیشدی. نئچه ایل ایدی کی، ناخچیوانا یولا دوشمه میشدی.

داوامی وار