گونئی آذربایجانیمیزین بیر چوخ ولایت­لرینده، اولدوغو کیمی، ماماغان بؤلگه سینده ده جور به جور فولکولور داورانیش­لاری وار. نذیرلر و قوربان کسم­لر ده اونلارین بیری دیر. نذیرلر آراسیندا نئیسان آشی داهادا آدلیم و ماراقلی دیر. اوزاق نسیل­لردن بری، ائل ایچینده بئله بیر قایدا وار ایدی کی یازدا و یا پاییزدا یاغیش­لار یاغاندا و بول محصول اولماسینا داهادا آرخایینلیق اولاندا محله ­لرده نذیر آشی پیشیرردیلر.

بونون آدی نئیسان آشی ایدی. قایدا بئله ایدی کی، خانیم­لار اؤز همسایالاریندان آش وسایطی توپلاییب، کوچه نین بیر گئنه– بول یئرینده و یا بؤیوک بیر ائو حیطینده و یا مقدسلیگی اولان بیر مکاندا اوجاق یاندیراردیلار، قازان آساردیلار و ائولردن توپلادیق­لاری آش وسایطینی قازانا تؤکوب، آشی پیشیرردیلر. اونلار ائولردن قاب توپلاییب و همان قاب­لارا آش دولدوروب، اونلارین اؤز ایشتیراک­لاریله پیشیریلن آش­دان هامی­یا وئرردیلر. بعضی عیللت­لره گؤره، آشین پیشیریلمه­سینده یاردیم­لاری اولمایان عائله لره ده آش وئرردیلر.

نئیسان آشینی­نین، پیشیرمه­ سی­نین بیر ماراقلی منظره ­سی­ده وار ایدی. بئله کی، او گون خانیم­لار پاکلانیب، دستماز آلیب، تمیز پالتارلاینی گئییب، قاب قاجاق­لارینی تمیز– تمیز یویوب و قونشولارا: «آی باجی، نئییسان آشی پیشیریریک، هر نه گتیریرسن گتیر آللاه برکت وئرسین» دئییردیلر. اونلاردا، آللاه قبول ائله­سین دئییب، کؤمک ائدردیلر. ایمکان­لاریندا اولان آش وسایطیندن گتیریب، توپلایان­لارا وئرردیلر و اونلار آشی بیر خاص علاقه ایله پیشیریب، ائو به ائو پایلاردیلار. آشی آلیب، ائولرینه آپاران­لار تانریدان بول یاغیش وئردیگینه گؤره تشکرلر ائدردیلر. نئیسان آشی پیشن گون بوتون قیزلار و جاوان خانیم­لار اونلارا کؤمگ ائدردیلر. بو ائل عادتی اینسان­لاری بیرلیکده خیدمت ائتمه­یه­ده، عادت وئریردی و اینسان­لار بیرلیکده گؤردویو ایش­لره داهادا علاقه­لی اولوردولار و اؤز اینانج­لارینا قوللوق ائدیردیلر. بو آللاهین بول نعمت­لریندن تشکر ائتمک و اونون قدرینی بیلمک عادتینی چئوره­ده اولان اینسان­لارا اؤیرتمک علامتی دیر.