گونئی آذربایجان‌دا سون چاغین دینامیک اینکیشاف ائد‌ن ادبیاتا، اؤزل‌لیکله پوئزییایا نظر سالدیق‌دا بورادا یاشایان خالقین اؤزونه‌مخصوص کولتورو، ادبیاتی، کیتاب مدنیتی، سؤزیاراتما قودرتینین نه قدر یوکسک اولدوغو یانسیییر.

محتشم مدنیت یارادان بیر خالق، سوسمایان دیلی، اؤزونو، کیملیینی، تاریخینی اؤیره‌نمک ایسته‌یه‌ن شاعرلری اولان خالق ایسه دونیا تاریخین‌دن هئچ واخت سیلینمیر، ابدیاشارلیق قازانیر...

مسعوت هارای ۱۹۷۴-جو ایلده خوی‌دا - اورمودا دونیایا گؤز آچیب. شاعر اؤز ترجمه حالی باره‌ده یازیر: "۸ ایله یاخین فارسجا شعیر یازدیم، دویغولاریمی، کدرلریمی آتا-آناملا پایلاشیم دئیه، تورکجه دوشونمه‌یه باشلادیم، بو یاشاییشیمین آجی چاغلارینین باشلانیشی اولدو. داها سونرا بو آجی ایچی‌می گزدی و منی کیم اولدوغوما دوغرو سورودو و ایندی من شاعر دئییله‌م، بلکه وطنیم آذربایجانین آجییان یاراسییام".

نفس آلدیغیم هاوانی،
آیاق باسدیغیم توپراغی،
اوددوغوم، ایچدییم سویو بئله آنلادیم.
باخ دلیلییم بوردان باشلادی.
بونو دوکتورلار هله بیلمه‌دی،
سن بئله بیلمدین،
معجزه‌لر بئله درمانیم اولاماز،
پیغمبرلر
قولتوقلارین‌دا کیتابلارییلا بئله.

***

تورکجه‌میز تمیزدیر، تایسیزدیر، قیزیم
گون گلیر دردیمیز داغ اولور، قیزیم،
قاپقارا باختیمیز آغ اولور، قیزیم،
اینله‌یه‌ن یارامیز ساغ اولور، قیزیم.
بیز وطن نامینا اؤلمیجییز،
دوشمه‌نین اوزونه گولمییجییز.

ال-اله وئررکه‌ن قالخاجاییق بیز،
تاریخه قانی ایله سالاجاییق ایز،
سنینله بیرلیک‌ده اولاجاییق بیز.
سئل کیمی، وولکان تک پاتلایاجاییز،
داغ-دره سایمادان آتلایاجاییز.
بو وطن، بو توپ‌راق ناموسوموزدور،
دوشمه‌نه وئره‌جک کابوسوموزدور،
بیز تورکوز، تورکجه‌میز قاموسوموزدور،
تورکجه‌میز تمیزدیر، تای‌سیزدیر، قیزیم.
تاریخ‌ده فخریمیز سای‌سیزدیر، قیزیم.

دده‌میز بابک‌دیر، آنامیز تومیریس،
وطن‌سیز بیر کره گولمز اوزوموز،
ایریجه آذری، تورکجه دوزوموز.
نامردلر آنلامیر، دوشونمور، قیزیم.
تحقیردن، سیته‌م‌دن اوشونمور، قیزیم.

تؤکولور گؤزوم‌دن تکر-تکر یاش.
هؤنکوروب گئجه‌لر آغلیرام یاواش.
آییل‌سا میللتیم، باش‌لانیر ساواش.
بیز وطن نامینا اؤلمیجییز،
دوشمانین اوزونه گولمیجییز.