آنا صحیفه کولت |
کولت. آذ آذربایجانین گؤرکهملی یازیچیسی فرمان کریمزادنین " تبریز ناموسو" آدلی تاریخی رومانینی تقدیم ائدیر:
کؤچورن آینوره مممدووا
بو دا اونو آقیبتی. ابو-ساید جاوان اوغلاندی، بئینی قاندی. ائله ائشیدیب کی، هر گلن هؤکمدار اؤزوندن اول ایشلنمیش وزیری اؤلدورمهلیدیر. بو اؤلکهده هله بیر وزیر اؤز اجلی ایله اؤلمهییب.
بس اوندا او پیرانی، نوردان یارانمیش اینسانا نئجه قیییرسان؟ بیلیرم کی، علی شاهدی بو دییرمانا سو تؤکهن. ایندی منیم ده فرمانیمی وئریب. منیم ده کؤکومه بالتا چالیب. من گئدیب شیروانا سوخولموش اؤزبیی قووورام، گورجوستانداکی قیامه یاتیزدیریرام، بو دا منیم قیمتیم. علی شاهین بارماغی اولماسا، ناخچیوانداکی او قصد ده اولمازدی».
میانهیه چاتاندا او، اوغلو ایله شهره گیرمهدی. قارا بیی گؤندردی کی، بیر خبر اؤیرهنسین. گؤرسون نه وار؟ نه دانیشیرلار؟ آتا-اوغول چای وادیسینده آتلارینی بیر سؤیوده باغلاییب، اؤزلرینی آغاجلارین قالینلیغینا وئریب، یولا باخماغا باشلادیلار. هر یئرده ساکیتلیک حؤکم سوروردو. تکجه آغاجلارداکی تک-توک قوشلار جیککیلدشیر، اوزونقویروق، آلادؤش ساغساغان آغاجدان داشا، داشدان یولا، یولدان بوداغا قونوب، اؤز دیلینده نسه دئییردی.
بیردن گؤردولر کی، یولدا توز قالخدی. بو توز بیر آتلینین دئییل، یوزلرله، مینلرله آتلینین قالدیردیغی توزاناغا بنزییردی.
-قوشونوموز گلیر، آتا.
-دایان. منیم حسابیما گؤره بیزیم قوشون بورادا اولمامالیدیر. تئز آتلاری بو تایا کئشیر، آغیزلارینی باغلایاق. آت گؤرهنده کیشنهمهسینلر.
اوغلو حسن بئله ده ائتدی. بیر آزدان قاباق صفلر گؤروندو. اؤنده گلن آت بئلینده اوتورموش آدام بالاجابوی، تؤسمهرک، یاستیبورون، یاستیالین قورموش ایدی.
آرتیق امیر چوبانا هر شئی آیدین اولدو. دستهنین بؤیوکلویوندن بیلینیردی کی، اونلار امیر چوبانین جزا وئردیی، آغیر سؤز دئدیی امیرلر، بیلردی کی، بیرلشیب، تبریز اوستونه گئدیرلر.
امیر چوبان بیر ده گؤردو کی، اوغلو اوخو کمانا قویوب، قورموشو نیشان آلیر. ان آخیرینجی آندا اونو بو حرکتدن یاییندیردی.
-نه ائلییرسن. اوغول؟ من هئچ، اؤز جاوان جانینا یازیغین گلمیر؟ اونو اؤلدوردون، بس او قدر قوشون؟ اونلار ائله بیزی آختارمیرلارمی؟
اوغلو کامانی الاجسیز چینیندن آسسا دا، آتاسینین یانیندا ایلک دفعه سؤیوش سؤیدو:
-آلچاق، گؤزوینهن گؤرهن! امیر چوبانین ائلدیی یاخشیلیقلار سنین گؤزوندن گلسین.
-بسدی. اوغلوم، او قورموش دئییل، قودورموشدو. او قدر حؤرمت ائلدیم، آخیردا منیم یئریمه گؤز دیکدی. نه اولار، من همیشه امیرلر امیری اولان دئییلهم. ایندی، گل مثلاًین بو طرفینی گؤتورک. اؤلکهنین اوستونه دوشمهن گلنده قورخوب قاچیر، اما قوشون ییغیب، اؤز اؤلکهسینین اوستونه گلیر. بئلهسیندن اؤلکه نه خئییر گؤرهجک؟
قورموش میتی ایله کئچهندن سونرا ائله دهشتلی بیر ایش اولدو کی، اوغلو گؤز یاشلارینی ساخلایا بیلمهدی. امیر چوبان دا دولدو، اما اؤزونو اله آلدی. اوغلو اونون گؤز یاشلارینی گؤرمملیدی. گؤرسه، لپا اؤزوندن چیخار، یئرلری بیلینردی.
قوشونون قاباغینجا نؤکرلر امیر چوبانین گؤیدمیر آتینی، اوغلونون دا دؤشوقارا آغ اورگهسینی آپاریردیلار. هر یهره ده اوزواشاغی بیر مئییت ساریمیشدیلار. قورموش اونون اؤزونو و اوغلونو توتا بیلمهسه ده، آتینی اسیر آپاریر، اوستونه ده بیر مئییت ساریییب، آداملارا بیلدیرمک ایستییردی کی، باخین، امیر چوبانی دا، اوغلونو دا اؤلدورموشهم.
-ساکیت، اوغلوم. بو یاخشیدی. بیزی اؤلموش بیلیب، هئچ کیم آرخامیزجا دوشمهیهجک، بیز ده ایستدییمیز یئره گئدیب چیخاجاغیق. خئیریمیزهدی.
-اؤلکه ایچینده بیابیر اولوروق آخی.
-ائیب ائلمز. اصیل گولهن – سونرا گولهندی.
-من اؤز اللریمله او ایتی جهنمه گؤندرهجهیهم!
قوشون میانهیه طرف گئتدی. اوندان بیر خئیلی سونرا دا قارا بی لاپ بد خبرله گلدی.
-دایی، اؤیرندیم کی، ابو-سید سنین توتولوب، اعدام اولونماغین اوچون قورموشا یارلیک وئریب.
-نئجه؟
-بلی. مینایهده منیم یاخین آداملاریم وار. اونلارا دا یاخشیلیغیم کئچیب. یازیقلار ایندی یاس ایچیندهدیر. بو خبر میانهیه اوچ گون قاباق چاتیب. هامی ائله بو بارهده دانیشیر. دئییردیلر، بیر گؤرون ده، بیزدن بیر نفر دیشنهن، دیرناقنان گلیب او مقاما یئتیشمیشدی، اونو دا نه وضعیته سالدیلار. اده، بیز ده بیر طایفه دئییلیک. بیرلییمیز یوخدو. اؤلمک، اؤلمکدی، خیریلداماق نه دئمکدی؟ نئینهیهجکلر، هامیمیزی اؤلدورهجکلر؟ بیزیم الیمیز-آیاغیمیز یوخدور؟
داوامی وار
تاریخ
2020.02.24 / 18:12
|
مولف
فرمان کریمزاده
|