اولی بورادا

کولت. آذ آذربایجانین گؤرکه‌م‌لی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

کؤچور‌ن آینوره مممدووا

خوجا فزلوللاه رشیدددینین قوردوغو نیزام بوتون اؤلکه‌ده پوزولوردو.

امیر چوبان خئی‌لی فیکیرلی‌دی و نه ائدجیینی بیلمیردی. بلکه ده علی شاه اونون گلمه‌سینی گؤزلییر. اورادا قانداللاتدیریب، اؤبکله دؤیوش‌ده قورخاق‌لیق ائدیب، قاچمیش قورموشون فئلینه اویاراق، اونو اعدام ائتدیره‌جک‌دیر. آخی، قورموش دا چوخ‌دان بری‌دی کی، گؤزونو امیرلر امیری وظیفه‌سینه دیکمیش‌دی. چوبانلا دوشمنچیلیینین اساسینی دا تشکیل ائد‌ن ائله بو ایدی.

بلکه هئچ سولتانییه‌یه، هؤکمدارین حضورونا گئتمه‌سین؟ بورادان دؤنوب کونیایا، اوغلونون یانینا آت سورسون؟ روم ائلین‌ده اوغلو ایله باش-باشا وئریب، موستقیل بیر دؤولت یارات‌سینلار؟ اونسوز دا ایلخانیلر دؤولتی اوولکی قدر گوج‌لو دئییل، خئی‌لی ضعیفله‌ییب. اوللر اونون اوردولاری قونشو اؤلکه‌لرین تورپاقلارینا سوخولاردی، ایندی اؤزونون تورپاقلارینی چیغناییرلار. روم ائلینی چوخ آسان‌لیقلا ایلخانیلردن قوپارماق اولار. آخی، تئیمورتاش ایلخانیلر اوچون اورادا نه قدر تزه تورپاقلار توتموش، اؤلکه‌نین سرحدلری مصر حدودلارینا چاتمیش‌دی.

بو باره‌ده چوخ فیکیرلش‌دی. اما اؤزونو راضی سالا بیلمه‌دی. بونون دا اساس سببی او ایدی کی، وطن‌دن، دوغما توپاق‌دان آیریلا بیلمیردی. دئیه‌جک‌دیلر کی، امیر چوبان اؤز اؤلکه‌سینه خیانت ائل‌دی، فراری دوش‌دو. اوغلونون طرفین‌ده دایانیب، ووروشان‌دا یئنه ده اؤز قوهوم-اقراباسی ایله قیلینج-قیلینجا گله‌جک‌دی. قارداش قارداشی اؤلدوره‌جک‌دی.

قارشی‌دا دا هله نه قدر ناملوم مسئله‌لر واردی. حیات بزه‌ن توک‌دن آسی‌لی اولور. امیر چوبان دا بئله بیر وضعیته دوشدویونو دویوردو. «اؤزوم هئچ، بس منیم اوغلوللاریم، قیزلاریم نئجه اولور؟»

هم ده هؤکمدار ابو-سید خان ائله بیلردی کی، دوغرودان دا امیر ال-اومرا چوبانین قلبینه خیانت توخومو سپیلیبمیش.

آخی، او امیرلر امیری‌دیر. اؤلکه‌ده هؤکمداردان سونرا ایکینجی آدام‌دیر. نئجه اولا بیلر کی، ایداره ائتدیی اؤلکه‌یه خاین چیخ‌سین؟» بیر ده کی، آخی، هؤکمدار اورتا یاش‌دا اولار، آغی آغدان، قارانی قارادان سئچر. اما منیم بو قوهوموم کؤرپه‌دیر. آروادیم دوله‌ن‌دی ابو-سیدین باجی‌سی‌دیر. کیم قاباغا دوشوب، نه دئییرسه، اونا دا اینانیر.

ایندیکی آداملار دا قان چاناغی‌دیر. رشیدددین کیمی بیر زکا صاحبینی اؤلدورتمه‌دیلرمی؟ چینگیز خان‌دان دا قاباق باشلاییب، بو نسلین بوتون تاریخینی یازدی

کی، اؤزلرین‌دن سونرا مین ایللر ده کئچ‌سه، یئنه ده اوخوناجاق. بلکه ائله بیزیم هامیمیزین آدینی اونون قله‌مینه گؤره تاریخ یادین‌دان ساخلایا.

داوامی وار