روسییا مدنیت ناظرلیینین نمایش اجازه‌سی وئرمه‌مه‌سی سببیندن گونئیلی رژیسسور جعفر پناهی‌نین "ساده بیر تصادف" فیلمی اولجه‌دن اعلان اولونموش تاریخ‌ده بو اؤلکه‌ده نمایشی لغو اولونوب.

Kult.az خبر وئریر کی، بو حاقدا فیلمین روسییا دیستریبوتور شرکتی معلومات یاییب.

شرکت اوکتیابرین ۳۰-دان روسییا کینوتئاترلاریندا (سینما) اکرانلاشدیریلماسی پلانلاشدیریلان فیلمین نمایشینه اجازه وئریلمه‌مه‌سینین سببینی آچیقلاماییب.

"ساده بیر تصادف" فیلمی ایران حکومتینی تنقید ائد‌ن کینورژیسسور، سونونجو کان فیلم فستیوالین‌دا ان یاخشی فیلم نومیناسییاسیندا "قیزیل پالما" مکافاتینی قازانان جعفر پناهی‌نین سون ایشی‌دیر. فرانسا بو فیلمی بو ایل اوسکاردا ان یاخشی بین‌الخالق بدیعی فیلم کاتئگورییاسی اوچون تتقدیم ائدیب.

سون هفته‌لر فرانسادا نمایش ائتدیریلن "ساده بیر تصادف" فیلمی فرانسالیلارین رغبتیله قارشیلانیب و اونون باشقا بیر نئچه اؤلکه‌ده ده نمایشی نظرده توتولوب.

قید ائدک کی، فیلمی رسمی اجازه اولمادان و حجابسیز قادین آکتیورلارین ایشتیراکی ایله ایران‌دا چکیلیب و ایران حکومتی انو قاداغان اولونموش اثرلر سیاهیسینا سالیب.