ولادیمیر پوتینین دوشنبه‌ده آذربایجانلا باغلی "روس‌دیللی اؤلکه‌دیر" سؤزلری نیه "دقت‌دن یاییندی"؟

غریبه‌دیر کی، اؤتن گون، پوتینین بو سؤزلرین‌دن سونرا سوسیال شبکه‌ده "باکی‌لیلار گونو" ایله باغلی سایسیز-حساب‌سیز پایلاشیملار دا آکتیولشدی - حالبوکی "باکی‌لیلار گونو" آدلی "تاریخ" دونن، او پایلاشیملار دا بو ایلین دئییل. سانکی پوتینین بو سؤزلری ایله او "تاریخ" خاطیرلانمیش، اینتئرنت‌ده آختاریشلار وئریلمیش و بونا گؤره ده سوسیال شبکه او گؤرونتولری اؤنه چیخارمیشدی!

"روس‌دیللی باکی"نین حسرتینی چکن و "ارمنییه دایی دئیه‌نلر" سوروسونون نئجه حسرتله، هم ده روس دیلینین "باکی شیوه‌سین‌ده" بو گونون اوزریندن مانیپولیاسییا ائد‌رک، آذربایجانلیلاری آشاغیلاما جهدینی مشاهده ائتمک آغیردیر؛ ان آغیری ایسه آشاغیلانانلارین آشاغیلایانلارا ال چالماسینی سئیر ائتمک‌دیر...

روسجانین بوتون س‌س‌ری-ده بیرمعنالی دومینانت اولدوغو و باکی‌دا اؤز دیلینه خور باخیب، روسجادا خوشبخت اولانلارین آشاغیلاییجی ریتوریکاسینا، اؤزلرینی بیزدن دئییل، "روس عالی ایرقیندن" اولدوقلارینی گؤستره‌نلرین سایینا/دایره‌سینه باخمایاراق، بو اؤلکه‌نین - یعنی او واختکی رسپوبلیکانین - سیاسی ائلیتاسی، ضیالیلاری، آیدینلاری آذربایجان دیلینین بوتون اینجه‌لیکلرینی ان یوکسک شکیل‌ده قورویوب ساخلاییردیلار، حتی س‌س‌ری-ده آذربایجان نادر رسپوبلیکا ایدی کی، اؤز دیلینین دولت دیلی اولماسینی کونستیتوسییایا سالمیش‌دی.

اورتا آسییا تورکلریندن فرقلی اولاراق، آذربایجان‌دا آنا دیلینین تمیزلیینین کئشیینده دوران بؤیوک بیر آیدینلار طبقه‌سی واردی - باخمایاراق کی، باکی‌دا "روس-ارمنی"لرین بللی یئرلرینده روسجا قوردالانماق‌دان خوش‌لانانلار بو خالقا اوستدن-آشاغی باخیر، "آلی ایرقه" قوشولوب، "چوشکا" اولمادیقلارینی ابلهجه‌سینه گؤسترمه‌یه چالیشیردیلار.

۸۰-جی ایللرین ایکینجی یاریسین‌دان ایسه بو اؤلکه‌ده جانلی دانیشیقدان روس سؤزلرینین تمیزله‌نمه‌سی آکسییایا چئوریلدی، ضیالیلار بونون اؤنونده دوردولار و زیبیللنن دانیشیق دیلینی اهمیتلی درجه‌ده تمیزله‌دیلر: والیدینلر اوشاقلارینی روس مکتبلریندن آذربایجان مکتبلرینه کئچیردیلر و س.

اما ایندی، ۴۰ ایلده‌ن سونرا یئنیدن ۷۰-جی ایللرین "نوستالژ"»سی قالخیب دئیه‌سن: بوتون محله‌لرده اوشاقلارین بیر-بیری ایله روسجا دانیشیغی ائشیدیلیر؛ شهرین مرکزینده روسجا قولاق دئشیر!

بو اؤلکه‌نین مستقیللیینی اعلان ائتمه‌سینین بیر نئچه گون سونرا ۳۴ ایلی تامام اولور - یعنی تامامیله یئنیلنمه‌یه کیفایت ائد‌جک زامان‌دیر، آنجاق جانلی دانیشیق‌دا روس سؤزلری آزالماق اوزینه آرتیر؛

بو اؤلکه‌نین مئدیاسی ۳۶ ایلدیر آزاددیر - هله ده "زاپراوکا" کیمی سؤزلری باشلیغا چیخاریب تیراژلاماقدان اوتانیب-خجالت چکن و بو عملین دیله خیانت اولدوغونو درک ائد‌ن یوخدور!

گؤر هانسی سوییه‌یه گلیب چیخمیشیق کی، "تیکتوکر" اولدوغونو نماییش ائتدیره‌ن، کیمینسه آلتینا ماشین آلیب قویدوغو خانیم‌جیغاز یاناجاق منطقه‌سینده سفارش وئررکن، "دوخسان پیات" دولدورولماسینی خواهش ائدیر و بونو چکیب یایماقدان زرره‌جه اوتانمیر!

هانسی شعور و دوشونجه ایله اؤز آنا دیلینده دانیشماق‌دان اوتانیب، بیلمه‌دیین دیلده دانیشماغا جان آتماق اولار؟

بیر انسان تمثیل اولوندوغو ملتی، اونون دیلینی نئجه سئومه‌یه بیلر آخی؟ بیر انسان نئجه آنا دیلینین یوخ، روسجانین خفتینی چکه بیلر آخی؟ بیر انسان نئجه جد-جهدله بیلمه‌دیی روسجادا دانیشماسی ایله اؤیونمه‌یه چالیشا بیلر؟

آذربایجان اشغالی بیتیره‌ن، اؤز اراضی بوتؤولویونو برپا ائد‌ن، رئگیون‌دا سؤز صاحبینه چئوریلن شرفلی بیر اؤلکه‌دیر - آز قالا بوتون دنیا آذربایجان‌دان اؤیره‌نمه‌یه چالیشیر!

بو اؤلکه کیم‌سه‌نین الینه باخمیر، دیله‌نمیر، صدقه ایله یاشامیر - عکسینه، اؤزو کیملره‌سه یاردیملار ائدیر!

بو اؤلکه‌نین وطنداشی اولماقلا، بو اؤلکه‌نین دیلین‌ده دانیشماقلا نیه فخر ائتمیرسینیز کی!

بو دولتین فخری آد-تیتوللارینی داشیییب، صفاسینی گؤروب، نیه روسجانین خفتینی چکمه‌لیسینیز؟

استانبول‌دا بیر گئییم ماغازاسیندا بیلمه‌دیین، قول-قانادی سیندیریلمیش روسجادا دانیشماغین آدی ندیر؟ بو منظره‌نی گؤره‌نده حیرتدن دونوب قالمیشدیم: آدام روسجا بیلمیر، اما روس دیلینده بیلدیی بوتون سؤزلری اؤز شیکست "لهجه‌سیله" بیر-بیرینین دالینا دوزوب، تورکییه‌ده، تصوور ائدیرسینیز، تورکییه‌ده و تورک ساتیجی ایله "انسیت قورماغا" چالیشیر. و بو "خانیم‌جیغازین" روس دیلین‌ده دئدیی "جمله‌نین" سؤزلری هئچ بیر معنا ایفاده ائتمیر.

حالبوکی آناسینین... دیلی ایله دانیشسا، تورک ساتیجی هر سؤزو آنلایار!

مسئله اوندا دئییل کی، بو اؤلکه‌ده اورتا مکتبلرین جمعی ۸ فایزی روس‌دیللی‌دیر!
مسئله اوندا دا دئییل کی، باکی‌دا روس دیلی "انسیت واسطه‌سی کیمی" سرعتله گئنیش‌لنیر!

مسئله دوشونجه‌ده‌دیر، آشاغیلیق کومپلئک‌سین‌ده‌دیر، روس دیلنده دانیشماقلا اؤزونو داها "عالی" گؤسترمک جهدینده‌دیر!

بیریلری حاق ائتمه‌دیی بوتون سوسیال امتیازلارا نایل اولوب، "آلتینی دولدوران‌دان" سونرا ایندی ده "باشینین دولو اولدوغونو" گؤسترمه‌یه چالیشیر و روسجا ایله: و بو، یالنیز تخمین ائتدیینیز کاتئگورییادان اولانلارا عایید دئییل، یئری سهو دوشه‌نلرین هامیسینا عاییددیر - تورکییه کانالیندا "مشهور آذربایجانلی ژورنالیست و اکسپرت" کیمی تقدیم ائدیلیب، "ایرانلا سورییانین سرحدین‌دن" دانیشان و ایرانلا سورییانین قونشو اولمادیغینی بیلمه‌ین ابلهلر دسته‌سینه قدر...

اونا گؤره پوتین آذربایجانی "روس‌دیللی اؤلکه" آدلاندیرا بیلیر!

و ان ماراقلی‌سی دا بودور: پوتینین بو سؤزو دئمه‌سیندن بیر سوتکا کئچیب، رئاکسییا یوخدور - سانکی بئله ده اولمالی‌دیر!

حالبوکی اوتانماق لازیم ایدی!

آذربایجان دیلی ۶۰-جی ایللرده بو جور اشغال اولونمامیشدی! او ایللرده بؤیوک بیر یارادیجی نسل بو دیلی بوتون عظمتی ایله یاشادیردی!