تبریزین عباسی بؤلگه‌سین‌ده یئرلشن تاریخی میرزا تقی حامامینین بیر حیصه‌سی داغیدیلیب.

Kult.az خبر وئریر کی، بو حاق‌دا تبریزین "نصرنیوز" خبر سایتی معلومات یاییب.

معلوماتا گؤره، بیر نئچه ایلدیر ملک صاحبلری ایله مدنی ارث تشکیلاتی آراسیندا مباحثه‌لی موضوعیا چئوریلن تاریخی عابده‌نین داغیدیلماسینا ایران عالی محکمه‌سی ده قرار وئریب.

شرقی آذربایجان مدنی ارث، توریزم و ال ایشلری تشکیلاتینین باشچیسی احمد حمزه‌زاده ده معلوماتی تصدیق ائدیب:

"عابده‌نین داغیدیلماسینین قارشیسینی آلماق اوچون تشکیلاتیمیزین محافظه امکداشلاری حادثه یئرینه گؤندرلسه ده ملک صاحبلرینین مقاومتی ایله اوزله‌شیبلر. بیلدیریلیب کی، حامامین سؤکولمه‌سی باره‌ده عالی محکمه ده ملکیت‌چیلرین ادعاسینی تامین ائدیب. بئله اولان حال‌دا بیز هئچ نه ائده بیلمه‌ریک و قانونی قرارا حرمتله یاناشمالیییق"،- حمزه‌زاده بیلدیریب.

قید ائدک کی، قاجارلار دورونه عایید اولان تاریخی میرزا تقی حامامی، تبریزین نادر معمارلیق نمونه‌لرین‌دن ساییلیر و ایران ملی اثرلر سیاهی‌سیندا قیدیاتا آلینیب.