آنا صحیفه کولت |
کولت. آذ آذربایجانین گؤرکهملی یازیچیسی فرمان کریمزادنین " تبریز ناموسو" آدلی تاریخی رومانینی تقدیم ائدیر:
کؤچورن آینوره مممدووا
قارا بی امیر چوبانین باجیسی اوغلو ایدی. اؤزنونون ده اوتوز یاشی اولایدی، یا اولمایایدی. نازیک اوزون بیغلارینی ائشیب، یانلارا آپارمیشدی. آلماجیق سوموکلری سرت بیر شکیلدیدی و اونو قتیتلی گؤستریردی. بیر چوخ جیگیزلریندن ده داییسینا اوخشاییردی.
-بس قوشون قاباغینا چیخمادی؟
-من اونلاری اوزاقدان گؤردوم، یولومو دییشدیم.
-دئمک، یارلیکی اوچ گون قاباق وئریب. دئییرم، آخی. ناخچیوان حاکمی نیه یانیما گلمهدی. دئمک، بیلیرمیش. اما خبر ده وئرمهییب. ائله قورموشا قوشولوب، گئجهنین قارانلیغینی گؤزلییرمیش کی، منی آرادان گؤتورسون. یئنه ده حسین کیشی.
قارا بی ناراحاتلیقلا سوروشدو:
-دایی، بس ایندی نه ائلیجییک؟ -«نه ائلیهجکسهن؟» دئمهدی. یعنی سن هارا، من ده اورا. هارا دا گئتسهلر، اونلاری اؤلوم گؤزلییردی.
سؤز یوخ کی، مصلحت امیر چوبانین ایدی.
او، «یارلیک» سؤزونو ائشیدندن اؤلچوب-بیچیردی. دئمک، ابو-سید بو آدامی آتیبسا، چوبانین نسلی اوستوندن چارپاز بیر ختت چکیلیر. اؤلکه کئچیر قلبیمده وطن قئیرتی اولمایان، یالنیز خالقی چاپیب-تالایان، اوزینده اونا ظلمدن، بدبختلیکدن باشقا هئچ نه وئرمهیهن بیر اوووج قئیرتسیزین علینه. بیر یاندان دوشمهنلر، بیر
یاندان زؤلری آزبایجانی، شیروانی، تبریزی، اردبیلی، موغانی، ناخچیوانی، قاراباغی، گنجهنی، شکینی جاناوار کیمی دارتیب داغیتسینلار.
بلکه ده او، اوغلو تئیمورتاشین یانینا گئتسین؟ اول، هئچ اولماسا، ابو-سیده آرخایین ایدی کی، اونون آرخاسیندا دایانیر. ایندی کیمه آرخالانسین؟ یالنیز قیلینجا، یالنیز گوجه. اوندا دا یئنه بو تورپاغی اؤز اؤولادلارینین قانی سووارمالیدیر. بئله اکیندن بیتهن ده خارابالیقلار، فاجعهلردیر.
یوخ، بو دا چیخیش یولو دئییل.
بیردن اونون یادینا بیر آدام دوشدو. اونونلا مسلهتلشمک لازیم ایدی. ائله بیل اوریینه، بئینینه سود کیمی آغ بیر ایشیق یاییلدی.
-آتلاری یهرلیین. گئدیریک گوندوغان طرفه.
اومید ایشیغی
او دؤورده مشهور آداملاری جاماات آتیندان تانیییردی. اونا گؤره ده بو آتلارا مینهنلری هئچ کیم ساخلامیر، هاردان گلیب، هارا گئتدیکلرینی ده سوروشموردولار. قورموش اونسوزدا دا اونون آتینی و «مئییدینی» گزدیرهنده بیر گونونیچینده بوتون اؤلکهیه یاییلمیشدی کی، امیر چوبان اوغلو حسنله بیرگه اؤلدورولوب.
اردبیله چاتیردیلار. اوزاقدان ماوی کاشیلی گونبز گؤرونوردو. امیر چوبان اولدن تدبیر گؤرموش، هر ایکیسی لیباسلارینی دییشیب، زووار پلاتاری گئیمیشدیلر. بو قارا ابا، آغ چالما ایله اونو هئچ کیم اؤلکهنین باش امیرینه بنزهده بیلمزدی.
آتلاری دهمرلهدیلر، بیر آزدان یاشیل گونبزین قاباغیندا آتلاریندان دوشوب، هئیأته کئچدیلر. بورادا چوخلو آدام واردی، اما سلطان ابو-سیدین قوشونو دا اونلارا بیر شئی ائده بیلمزدی. چونکی بو ایقامتگاه اؤلکهنین ان نفوذلو شخصیتی اولان شئیخ سفیددینین حاکمیتی آلتیندا ایدی. بیر دفعه شئیخ ایشاره وئرسه، شاهین قوشونوندان دا بؤیوک بیر قوشون توپلانا بیلردی. شئیخ سفیددین ائله بیر نفوذ صاحبی ایدی کی، نه اونون قوشون توپلاماسینا، نه جببخانا ساخلانماسینا هئچ هؤکمدار دا مانع اولا بیلمیردی.
امیر چوبان شئیخ سفیدینین موریدلریندن بیریدی. اونا گؤره ده بو دار آیاقدا اونون یادینا اردبیل پیری دوشموشدو. شئیخین آدینی دئمیردیلر. هامی «اردبیل پیری» دئییردی.
داوامی وار
تاریخ
2020.02.25 / 18:12
|
مولف
فرمان کریمزاده
|