کولت. آذ موللا نطرالدین حکایه‌لری سیلسیله‌سین‌دن نؤوبتی حکایه‌نی تقدیم ائدیر:

دئییرلر، تیمورلنگ اوردوسون‌دا فیل ده ساخلاییرمیش. فیللری آیری-آیری کندلره گؤندریرمیش کی، اورادا ساخلاسینلار. فیللردن بیرینی ده ملا نسرددین اولان کنده گؤندریر. تیمورلنگین قورخوسون‌دان کیم‌سه فیله توخونمور. فیل کئیفی نه ایستییر ائلییر، اکین-زمینی، باغ-باغاتی، بوستانی یئییب ترک ائدیر. کندلیلر فیلین الین‌دن لاپ تنگه گلیرلر. اونلار ییغیلیب ملانین یانینا گلیرلر:
— آ ملا، بو فیل بیزده ایستراحت قویمادی، گل قاباغا دوش. امیرین یانینا گئدک، دردیمیزی اونا دئیک، بلکه بیر رحمی گلدی، فیلی آپاردی.
ملا راضی اولور. اونلار تیمورلنگین یانینا یولا دوشورلر. یول‌دا کندلیلر تیمورلنگین قورخوسون‌دان ایکی ییر-اوچ بیر قاچیب داغیلیرلار. تیمورلنگین قاپیسینا چاتاندا ملا باخیر کی، هامی قاچیب، تکجه اؤزو قالیب، اؤز-اؤزونه دئییر:
— یاخشی، گؤرون سیزین باشینیزا نه اویون گتیره‌جه‌یه‌م. تیمورلنگ اوندان سوروشور:
— ملا، نه اوچون گلمیسه‌ن؟
ملا دئییر:
— امیر ساغ اولسون، بیزیم کنده بیر فیل قوناق گؤندرمیسه‌ن. بوندان چوخ راضیییق. آنجاق فیل تک اولدوغوندان سس-کویوندن دایانا بیلمیریک. کندلیلر ده منیمله گلمیشدی، جسارت ائلییب ایچری گیرمه‌دیلر. خواهیش ائدیریک، بیر دیشی فیل ده گؤندره‌سه‌ن.
تیمورلنگین ملانین سؤزوندن خوشو گلیر، اونا چوخلو انعآم وئریر. امر ائلییر کی، او کنده بیر دیشی فیل ده گؤندرسینلر. ملا دا آلدیغی هدییه‌نی گؤتوروب سئوینه-سئوینه ائوینه گلیر. کندلیلر اونو گؤروب سوروشورلار:
— ملا، نه اولدو؟
ملا جواب وئریر:
— گؤزونوز آیدین، فیلین او بیری تایی دا گلیر.