سنتیابرین ۱۷-ده مدنی فعاللار آذربایجان شاعری محمدحسین شهریارا حصر ائدیلمیش مراسیم کئچیریبلر.

Kult.az خبر وئریر کی، تدبیر گونئی‌لی مدنی فعال و صنعتچیلرین قوردوغو «یوردوموزون سؤزلری - کپنکلر» مدنی قورومونون تشکیلاتچیلیغی ایله باش توتوب.

مراسیمده ۱۳ یاشدان آشاغی آذربایجان‌لی اوشاقلار شهریار و اونون یارادیجیلیغی ایله باغلی شعیرلر سسلندیریب، شهریارین آذربایجان دیلینده یازدیغی شعیرلری دیکله‌مه ائدیبلر.

حکومت قوروملاری طرفین‌دن تؤره‌دیلن مانعه‌لره باخمایاراق، مراسیم آذربایجانلیلارین بؤیوک رغبتی ایله قارشیلانیب. تهران و قزویندن اولان قوناقلارین تدبیره قاتیلمالاری مراسیمه خصوصی رنگ قاتیب.

تشکیلاتچیلار مراسیمین سونوندا آذربایجان دیلین‌ده چیخیش ائد‌ن و شعیرلر سسلندیره‌ن اوشاقلارا شهریارین پورترتی حک ائدیلمیش تقدیر لؤحه‌لری وئریبلر.

قید ائدک کی، آذربایجانلیلارین اعتراضلارینا باخمایاراق، ایرانین مدنی انقلاب عالی شوراسینین قراری ایله ۲۰۰۰-جی ایلدن ۱۸ سنتیابر شهریارین آنیم گونو "فارس دیلی و ادبیاتی گونو» کیمی قید ائدیلیر.