ایران کینو و تلویزییاسینین یئگانه خاریجی آکتریساسی ایتالییا-آذربایجان اصیللی آوا دارویتتدیر.

Kult.az خبر وئریر کی، آوا دارویتت ۱۳ سنتیابر ۱۹۹۳-جو ایلده آوسترییانین رویت شهرینده آنادان اولوب.

آتاسی ایتالییالی، آناسی ایسه گونئی آذربایجانین میانا شهریندن اولان آوا ۲۰۰۰-جی ایلده، ۷ یاشیندا عائله‌سی ایله بیرگه میانایا قاییدیب.

کلینیک پسیخولوگییا اوزره آسپیرانت اولان آوا دارویتت سونرادان آکتیورلوق درسلرینده اشتراک ائدیب. بو ساحه‌یه اولان ماراغینا و ایستعدادینا گؤره، آوا قیسا مدتده رژیسور و کینماتوگرافچیلارین دقتینی جلب ائدیب.

او، ایلک صنعت تجروبه‌سینه ۲۲ یاشین‌دا «معمایی شاه» سریالینا چکیلمه‌سی ایله باشلاییب.

۲۰۱۵-جی ایلده بدیعی فیلملرده اویناماغا باشلایان آوا دارویتت ۲۰۱۷-جی ایلده یونان اولیمپییا فیلم فستیوالین‌دا اشتراک ائدیب. بونونلا دا کینو آکتریساسی کیمی شهرت قازانیب.

آذربایجان-ایتالییا اصیل‌لی آکتریسا ایرانا قاییتدیقدان سونرا آنا و آتا دیلینده تحصیل آلا بیلمه‌مه‌سینین اونا یاشاتدیغی چتین‌لیکلری، ووردوغو تراومالاری کدرله خاطیرلاییر.

آذربایجان شهری میانادا تحصیلین فارسجا اولدوغونو دئیه‌ن گنج صنعتچی، مکتبین ایلک ایللرینده بونون اؤزو و قارداشینا یاراتدیغی پروبلملری، تؤرتدیی پسیخولوژی اذیتلری اونوتمادیغینی دئییر:

«ایبتیدای تحصیلیمی اوشاقلارین هامیسینین تورک اولدوغو آذربایجانین میانا شهرینده آلمیشام. بوتون شاگیردلرین آذربایجانلی اولماسینا و تورک دیلینده دانیشمالارینا باخمایاراق، تحصیل فارس دیلینده آپاریلدیغی، معلملر فارسجا درس کئچدیی اوچون مکتبین ایلک ایلینده اونلاری آنلاماق، درسلری باشا دوشمک منیم اوچون چوخ چتین ایدی. مکتبین ایلک هفته‌لری معلملری باشا دوشه بیلمدییم اوچون صینیف‌ده آغلاییر، ائوده ایسه زامانیمی غیری-معین‌لیک و بحران ایچینده کئچیریردیم. بو، اوشاق باغچاسینا گئدن و مندن یاشجا کیچیک اولان قارداشیم آرمان‌دا دا بئله ایدی»،- او، خاطره‌لریندن دانیشارکن دئییر.