بو گون گونئی آذربایجان و ایران کینوسونون تانینمیش سیمالارین‌دان اولان رئژیسسور یدالله صمدینین آنیم گونودور.

Kult.az خبر وئریر کی، او، ۱۹۵۲-جی ایلین نویابر آیینین ۱۷-ده شرقی آذربایجان ایالتینین ماراغا شهرین‌ده آنادان اولوب.

یدالله صمدینین چکدیی بیر چوخ کینو-فیلمین مؤوضوسو تورک دیلی و مدنیتی، همچینین آذربایجان ایالتلرین‌ده باش وئره‌ن حادثه‌لره حصر ائدیلیب.

رئژیسسورون ۱۹۸۶-جی ایلده چکدیی "آوتوبوس" کینوفیلمی او دؤورون ان چوخ ساتیلان فیلملریندن اولوب. گونئی آذربایجانین کندلرین‌ده ایکی طایفه آراسین‌داکی قارشی‌دورمانی تصویر ائد‌ن "آوتوبوس" فیلمینین حکایه‌سی اصلین‌ده صفویلر دؤنه‌میندن بری داوام ائد‌ن "حیدری-نعمتی" طریقتلری موناقیشه‌سینین بیر تمثیلی‌دیر.

آوتوبوس فیلمین‌دن ۳ ایل سونرا چکیله‌ن "ساوالان" فیلمینین حکایه‌سی ده گونئی آذربایجان‌دا باش وئره‌ن حادثه‌لره اساس‌لانیر. فیلمین باش قهرمانی کوراوغلو ساوالان کندینین اهالی‌سینی باسقین‌چیلارین هجومون‌دان قورویور.

اورمییا آشیق مکتبینین ایکی بؤیوک اوستادی آشیق درویش و آشیق یوسوف مووافیق اولاراق "آوتوبوس" و "ساوالان" فیلملرین‌ده رول آلیب و ماهنی ایفا ائدیبلر.

رئژیسسورون ۱۹۹۴ و ۱۹۹۷-جی ایللرین‌ده چکدیی "دلی دومرول" و "سارای" فیلملری گونئی آذربایجان‌دا تورک دیلینده، اؤلکه‌نین دیگر بؤلگه‌لرینده ایسه فارس دیلینده نماییش اولونوب.

"سارای" فیلمینین موسیقی‌سینی مشهور گونئی‌لی سنتکار آشیق چینگیز مهدی پور بسته‌له‌ییب.

رئژیسسورو اولدوغو "تکه‌مچی" آدلی تلویزییا فیلمی ایسه ایراندا تورک کیملیینین آشاغیلانماسی و تورکلرین پایتخت تهران‌دا لاغا قویولماسینی تصویر ائدیر.

یدالله صمدینین دیگر اثرلرینین بؤیوک قیسمی کومئدییا فیلملرین‌دن عبارت‌دیر.

ماراغالی رئژیسسور اوزون ایللر قارا جییر خسته لییندن اذیت چکیب. اونا یئنی جییر ترانسپلانتاسییا اولون‌سا بئله صحتینده‌کی پروبلئملره گؤره ۲۵ سنتیابر ۲۰۱۸-جی ایلده ۶۶ یاشین‌دا شیرازدا دونیاسینی دییشیب