ایران کینوسونون تانینمیش آکتریساسی پروانه معصومی ۷۸ یاشیندا دونیاسینی دییشیب.

Kult.az خبر وئریر کی، او، آغ جیگر اینفکسییاسیندان وفات ائدیب.

اصلن گونئی آذربایجانین همدان ایالتینین کبودرآهنگ بؤلگه‌سیندن اولان سکینه کبودرآهنگی (پروانه معصومی) ۲ مارت ۱۹۴۵-جی ایلده آنادان اولوب.

ایران میللی اونیورسیتتینین "خاریجی دیللر" فاکولته‌سینی بیتیرن آکتریسا سونرادان صنعت ساحه‌سینه میل‌لنیب. آکتریسا ایلک دفعه ۱۹۷۱-جی ایلده "بیتا" فیلمینده رول آلیب.

اونلارلا کینودا رول آلان صنعت‌چی بیر نئچه داخیلی و بین‌الخالق فیلم فستیوالین‌دا مکافاتلاندیریلیب.

او، سون ایللر حاکمیته قارشی اولان اعتراض آکسییالاریندا سوسدوغو، ائلجه ده علی خامنه‌ای ایله گؤروشده اشتراک ائتدیی اوچون بیر چوخلاری اونون اؤلومونه مناسیبت بیلدیرمه‌ییب.

بیر چوخ تانینمیش صنعت‌چیلر، رژیسورلار و ضیالیلار آکتریسانین صنعتینی یوکسک قیمتلندیرسه‌لر ده، اؤلومو باره‌ده آچیقلاما وئرمکدن ایمتینا ائدیبلر.

بیر سیرا تانینمیشلار ایسه اونون تاریخین یانلیش طرفینده و عدالتسیزلرله عینی جرگه‌ده دوردوغو اوچون اؤلوموندن تاسفلنمه‌دیکلرینی بیلدیریبلر.

قید ائدک کی، مرحوم صنعتکار گنج واختلاریندا، پهلوی حاکمیتی دؤورونده سارایا یاخین صنعت آداملاریندان اولوب.