بو گون بؤیوک صنعتکار، آذربایجان و روسییانین خالق رسامی، آوروپا علم و اینجه صنت آکادمییاسینین حقیقی عضوو، دؤولت موکافاتی لاورئاتی طاهیر صالاحووون آنادان اولماسین‌دان ۹۵ ایل اؤتور.

Kult.az خبر وئریر کی، بؤیوک صنعتکار ۱۹۲۸-جی ایل نویابرین ۲۹-دا باکی شهرین‌ده دونیایا گؤز آچیب.

آتاسی ۱۹۳۷-جی ایل رپرسییاسینین قوربانلارین‌دان اولدوغون‌دان رسامین اوشاق‌لیق ایللری چتین کئچیب. بلکه ده اوشاق‌لیقدا چکدیی چتین‌لیک و اضطرابلار اونون هم ایستعدادلی رسام، همده اصل اینسان کیمی فورمالاشماسین‌دا بیرباشا رول اویناییب.

ت. صالاحوو ۱۹۵۱-جی ایلده باکی‌دا ا.عظیم‌زاده آدینا رسام‌لیق مکتبینی، ۱۹۵۷-جی ایلده ایسه سوریکوو آدینا موسکوا رسام‌لیق اینستیتوتونو بیتیریب.

ت. صالاحوو دونیا میقیاسین‌دا آپاریجی پورترت اوستاسیدیر. اونون یارادیجیلیغین‌دا اینسانی بشریتین ان عالی وارلیغی کیمی اساس پلاندا گؤروروک. رسام عائله‌سینی و دوستلارینی بؤیوک محببتله تصویر ائدیر. «آیدان»، «آلاگؤز شرق ناغیلی»، آناسی سونا خانیمین و حیات یولداشی واروارا آلئکساندروونانین سلسیله پورترتلری، «دانین پورترتی»، «رشید بهبودووون پورترتی» - سادالانان بو اثرلر مهریبانلیغی و ایستی مناسیبتی تجسم ائتدیریر.

ت. صالاحووون اثرلری دونیانین بیر چوخ موزه و قالریالارینین سالونلارینی بزه‌مک‌ده‌دیر. خصوصاً ده ترئتیاکوو قالریاسین‌دا رسامین بیر چوخ اثرلری نوماییش اولونور. اونلاردان «ویانا ایستولو ایله ناتورمورت»، «نار گوللری ایله ناتورمورت»، «آیدان»، «بستکار د.شوستاکوویچین پورترئتی» و س. آدلاری چکمک اولار.

«خزر، اونون ماوی گؤزللیگی همیشه منیمله‌دیر»، - سؤیله‌یه‌ن طاهیر صالاهوو دوغما وطنینین طبیعتینه وورغون‌دور و هر فورصتده یوردونون گؤزاوخشایان گوشه‌لرینی تابلولارین‌دا جانلاندیریر. رسام خصوصیله بویا-باشا چاتدیغی دوغما آبشئرونونو بؤیوک محببتله تصویر ائدیر.

انتینه دؤولت قایغی‌سی گؤستریله‌ن بؤیوک صنعتکار سایسیز-حساب‌سیز موکافاتلارا صاحب‌دیر. فیرچا اوستاسی کئچمیش سووت اتفاقینین ان یوکسک تلتیفلری و اوردنلرینه لاییق گؤرولوب، سوسیالیست امیی قهره‌مانی آدینی آلیب. روسییانین «وطن قارشیسین‌دا خیدمتلرینه گؤره» ایکینجی و اوچونجو درجه‌لی اوردنلرینه، مستقیل آذربایجانین عالی موکافاتی اولان «استیقلال» و «حیدر علیئو» اوردنلرینه، بلقاریستان، پولشا، منقولوستان و باشقا اؤلکه‌لرین اوردئنلرینه، موختلیف مداللارینا و موکافاتلارینا لاییق گؤرولوب.

خالق رسامی ۲۰۲۱-جی ایلین مایین ۲۱-ده وفات ائدیب.