بو گون آذربایجانین خالق آرتیستی عباس میرزا شریفزاده‌نین آنادان اولماسینین ۱۳۰-جو ایلدؤنومو تمام اولور.

Kult.az خبر وئریر کی، شریف‌زاده ۱۸۹۳-جو ایل دکابرین ۱۲-ده شاماخی‌نین یوخاری قالا محله‌سینده، ضیالی عائله‌سینده آنادان اولوب.

۱۹۰۲-جی ایلده شاماخی‌دا دهشتلی زلزله باش وئریر. عائله باکی‌یا کؤچمک مجبوریتینده قالیر. بئله‌لیکله، یئنی‌یئتمه عباس میرزانین حیاتیندا سرت بیر دؤنوش یارانیر، بوتون سونراکی فعالیتی باکی ایله باغلی اولور.

او، آکتریسا مرزیه داوودووانین حیات یولداشی، آکتریسا فرنگیز شریفووانین آتاسیدیر. «آوروویزیون– ۲۰۱۱» ماهنی مسابقه‌سینده آذربایجانا غالیبیت قازاندیران الدار قاسیموو ایسه گؤرکملی صحنه اوستاسینین نتیجه‌سیدیر.

عباس میرزا شریف‌زاده آذربایجان خالقینین دنیا مدنیتینه بخش ائتدیی نادر استعدادلارداندیر. ۱۹۰۸-جی ایلده عباس میرزا مولیرین «زورن طبیب» اثرینده‌کی اپیزودیک روللا ایلک دفعه صحنه‌یه چیخیر. ۱۹۱۱-جی ایلده عبدالرحیم بی حاق‌وئردیئوین «آغا محمد شاه قاجار» فاجعه‌سینین اساس قهرمانی اولان قاجارین اوبرازینی یاراتماقلا اؤزونو آرتیق پئشه‌کار آکتیور کیمی تصدیق ائدیر.

شریف‌زاده آذربایجان تئاتری تاریخینه حاملتی اوینایان ایلک آکتیور کیمی داخیل اولوب. اثر ۱۹۲۶-جی ایلده درام تئاترینین صحنه‌سینده قویولموشدو.

گؤرکم‌لی صنعتکار «شیخ سنان»، «اوگتای ائلوغلو»، «آیدین»، «آغا محمد شاه قاجار»، «قاچاق کرم» کیمی تماشالارا رژیسورلوق ائدیب، «لیلی و مجنون»، «اصلی و کرم»، «آشیق غریب»، «شاه اسماعیل» اوپرالارینا قورولوش وئریب. او، چوخ ایلکلره امضا آتیب. ایلک کینو رژیسوروموز اولوب. «بیسمیللاه»، «حاجی قارا»، «گیلان قیزی»، «محبت اویونو» فیلملرینی چکیب.

۱۹۳۵-جی ایلده خالق آرتیستی آدینا لاییق گؤروله‌ن آذربایجان تئاترینین کوریفیلریندن اولان، گؤرکملی کینو و تئاتر رژیسورو عباس میرزا شریف‌زاده ایکی ایلدن سونرا ۱۹۳۷-جی ایلده خالق دوشمنی کیمی ان آغیر جزایا - اؤلوم حکمونه محکوم ائدیلیب. «عمومیتله، من تئاتر، کینو، صحنه-صنعتدن باشقا بیر شئی بیلمیرم، وسلام!»، - دئیه‌ن آکتیورون سون سؤزلری بئله اولوب.

عمرونون و صنعتینین چیچک‌لنه‌ن دؤورونده - ۱۹۳۸ جی ایل ۱۶ نیابردا ۴۴ یاشیندا قتله یئتیریلن شریفزاده آذربایجان خالقینین اونوتمایاجاغی و یادداشیندا دایم قالاجاق صنعتکارلارداندیر.