کلاسیک آذربایجان موغاملارینین قورونوب ساخلانماسیندا و تبلیغینده بؤیوک خیدمتلری اولان صنعتکارلاردان بیری ده گؤرکملی تار اوستاسی بهرام مانصوروودور.

Kult.az خاطیرلادیر کی، مانصوروولار سلاله‌سینین نماینده‌سی بهرام مانصوروو ۱۹۱۱-جی ایلده ایچریشهرده دونیایا گؤز آچیب.

تارزن عائله‌سینده دونیایا گلن بهرام، مانصوروولار نسلینین موسیقی عنعنه‌لرینین داوامچی‌سی اولماق شانسی قازانمیشدی. ماهیر تارزن اولان آتاسی مشهدی سلیمان اوغلونون تارا میلینی گؤروب اونون تئزلیکله یاخشی بیر تارزن اولاجاغینی دئیرمیش.

سککیز یاشیندان تار چالماغا باشلایان بهرامین ۱۹ یاشی اولان‌دا مسلم ماقومایئو اونو خالق چالغی آلتلری اورکسترینه، داها سونرا ایسه اوپرا و بالت تئاترینا سولیست-تارزن کیمی دعوت ائتدی. ۱۹۲۹-جو ایلدن آذربایجان دولت شرق اورکسترینین، سونرالار آذربایجان دولت فیلارمونییاسینین سولیستی اولدو. اوپرا و بالت تئاتریندا حسین قولو سارابسکی، یاور کلنترلی، حسیناغا حاجی‌بابابیوو کیمی کوریفیلرله ایشله‌دی. روبابه مرادووا، سارا قدیمووا، ابولفت علیو، گولخار حسنووا، زینب خانلارووا، مایس سالمانوو، باکیر هاشیموو، قولو عسگروو، عاریف بابایئو، نزاکت مممدووا، بابا میرزایئو و باشقا صنعتکارلاری مشایعت ائتدی.

بهرام مانصوروو ایلک آذربایجانلی موسیقی‌چیدیر کی، اونون ایفاسیندا «چهارگاه» و «راست» موغاملاری نوتا آلینیب، «بیات شیراز»، «هومایون»، «شور»، «بایات کرد»، «چهارگاه» ایلک دفعه یونسکو-نون خطی ایله واللارا و سی‌.دی-لره یازیلیب، بوتون دونیایا یاییلیب.

گؤرکم‌لی تارزن ۵۴ ایل اوپرا و بالت تئاترین‌دا چالیشیب، موغام اوپئرالاریندا خواننده‌لری مشایعت ائدیب.

اونون ایفاسیندا اولان بوتون موغاملار، درامد، دیرینگه، تصنیف و رنگلر اوغلو ائلدار مانصوروو طرفیندن نوتا سالینیب.

۱۹۷۱-جی ایلده تانینمیش آذربایجان موسیقی‌چی‌سی، تارزن بهرام مانصورووا حصر اولونموش «چالیر بهرام مانصوروو» سندلی تلویزییا فیلمی چکیلیب.

خالق آرتیستی بهرام مانصوروو ۱۹۸۵-جی ایل مایین ۱۴-ده، عمرونون ۷۵-جی ایلینده وفات ائدیب.

پرزیدنت ایلهام علیئوین موافق سرانجامی ایله ۲۰۱۱-جی ایلده خالق آرتیستی، گؤرکملی تارزن بهرام مانصورووون آنادان اولماسینین ۱۰۰ ایللیی قید ائدیلیب.

هر دفعه اونا قولاق آساندا ندنسه یادا اؤلمز شهریارین بو مصراعلاری دوشور: «تاردان اؤزگه قالمادی یاری-وفاداریم منیم». تار صنعتیمیز، موغاملاریمیز یاشادیقجا اؤلمز صنعتکاریمیز بهرام مانصوروو دا خاطیرلاناجاق.