بو گون خالق آرتیستی، آذربایجاندا ایلک پشه‌کار تئاتر تحصیلی گؤرموش آکتریسا فاطمه قدرینین آنیم گونودور.

Kult.az خاتیرلادیر کی، فاطمه قدیر قیزی قدری ۱۹۰۷-جی ایل آپرلین ۱۴-ده اودسادا دوغولوب.

او، عائله‌سینین ۱۰-جو قیز اؤولادیدیر. بو سببدن، والیدینلری اونون آدینی آرتیق قویور.

فاطمه‌نین عائله‌سی جنوبی آذربایجانین سراب شهریندن اودسایا داشینمیب. فاطمه‌نین اون ایکی یاشی اولسا دا، او مکتبه گئده بیلمیر، یاشیدلاریندان گئری قالیردی.

قیزینین اوخوماق آرزوسونو حس ائد‌ن آناسی گونلرین بیرینده فاطمه‌نین الیندن توتوب اونو تانیدیقلاری بیر ائوه گتیریر. او، اون ایکی یاشلی قیزینی بو عائله‌یه قوللوقچولوغا وئریر. فاطمه بورادا عائله‌نین قوللوقچولوغونو ائدیر، اونا وئریلن امک‌حاققینی ایسه مکتب پولو کیمی ییغیب توپلاییر.

گونلرین بیر گونو فاطمه اودسادا چکیست ایشله‌ین احد آخوندزاده ایله قارشیلاشیر. آخوندزاده فاطمه‌یه عاشق اولور و اونو اؤزو ایله باکییا گتیریر. بورادا او، اؤزونون «آرتیق» آدی ایله ویداع‌لاشیب «فاطمه» آدینی گؤتورور، سوی‌آدینی ایسه آتاسینین آدینی یازدیریر.

فاطمه شوکت علی‌اکبرووانین تشببوثو ایله آذربایجان پداگوژی اینستیتوتونا داخیل اولور. لاکین او عائله‌سیندن گیزلین هم ده دولت تئاتر تکنیکومونا داخیل اولور. بورادا آلکساندر توقانوولا، جعفر جبارلی ایله تانیش اولور.

آکتریسا اولماغینی ایسته‌مه‌یه‌ن حیات یولداشیندان آیریلیر. صحنه فعالیتینه میرزا جلیلین «آنامین کیتابی» درامیندا گنج گول‌بهار رولونو ایفا ائتمکله باشلاییر.

او، آکتریسالیق فعالیتی مدتینده «سئویل»، "شیخ صنعان"، "پاریس نوتردام کیلسه‌سی"، "آنامین کیتابی"، "دوبرووسکی"، "واقف"، "رومیو و جولتا"، "اوتلو"، "مکر و محبت"، "جهیزسیز قیز"، "طوفان"، "آیدین" تماشالاریندا آپاریجی روللار ایفا ائدیب.

بؤیوک آکتریسا ۱۹۶۸-جی ایلین فورالیندا، ۶۰ یاشیندا وفات ائدیر و فخری خیاباندا دفن اولونور.