Kult.az خالق شاعری جابیرنووروزون «ساغلیغین‌دا قیمت وئرین اینسانلارا» شعیرینی تقدیم ائدیر:

بیر آرزوم وار، آی آداملار، قویون دئییم،

ساغلیغیندا قیمت وئرین اینسانلارا،

یاخشیلارا ساغلیغیندا «یاخشی» دئیین،
ساغلیغیندا «یامان» دئیین یامانلارا.

یالنیز، یالنیز ساغ اولان‌دا،
هر کس اصیل قیمتینی بیلر اوندا،
بو سؤزلریم دوز اولماسا تؤهمت ائدین.
سیزدن ریجا ائلییرم میلیون کره،
شاعرلره ساغلیغین‌دا حرمت ائدین،
ساغلیغیندا هیکل قویون اؤلمزلره...

گله‌جه‌یه چوخ دا اومید باغلامایین،
سؤزونوزو سونرالارا ساخلامایین.
زهلم گئدیر سونرالاردان،
واختسیز دینه‌ن زورنالاردان،
بوشبوغازدان، آوارادان،
تویدان سونرا ناغارادان.

ساغلیغین‌دا سئویندیرین تمیزلری،
سیز حیاتدا بو آماللا آددیملایین.
ساغلیغین‌دا ایفشا ائدین خبیثلری،
ساتقینلارا ساغلیغیندا «ساتقین» دئیین،
«تولکو» دئیین تولکولره، «آسلان» دئیین آسلانلارا.
ساغلیغین‌دا قیمت وئرین اینسانلارا...

هر کس بیلسین اؤز یئرینی نئجه ساغدیر،
بو، پیسلرین حیاتینی قیسالتماقدیر،
یاخشیلارین حیاتینی اوزاتماق‌دیر...

بو ندندیر اؤلن کیمی،
قلبیمیزده آداملارا سئوگی، حرمت آشیب-داشیر.

اؤلن کیمی یاخشیلار دا یاخشیلاشیر،
یامانلار دا یاخشیلاشیر...
چیرکینلر ده تمیز اولور اؤلن کیمی...
یادلار بئله عزیز اولور اؤلن کیمی...

خاطره‌لر سؤیلییریک، نکرولوقلار قوللاییریق،
هامی‌سینی اوجدانتوتما «یاخشی» دئییب او دونیایا یوللاییریق.
بو گئجیکمیش خیر-دعا کیمه گرک؟
بوندان مزار بؤیویه‌جک، یا اؤلنمی دیریله‌جک؟
خوشوم گلمیر بو کهنلمیش عادتلردن، خوشوم گلمیر...

بو سردابا سئوگیلردن، حرمتلردن خوشوم گلمیر.
ایستمیرم واخت-وعده‌سیز شهرتی من،
بیر آن عمرو میلیون قیزیل اؤلوم گله، دییشمرم...
دیری اوچون اینه بویدا حرمتی من
اؤلو اوچون مین هیکله دییشمره‌م...

دوز دئمه‌سه‌م، اوندا منی باغیشلایین،
اوز توتارام اوشاقلارا، قوجالارا، جوانلارا،
ساغلیغیندا قیمت وئرین اینسانلارا،

یاخشیلارا ساغ اولاندا «یاخشی» دئیین،
ساغلیغیندا «یامان» دئیین یامانلارا...

خاطرلاداق کی، بو گون آذربایجان ادبیاتینین گؤرکملی نماینده‌سی، خالق شاعری جابیر نوروزون آنادان اولماسیندان ۹۱ ایل اؤتور.