تبریزده قدیم تورک دامغالاریندان عبارت سرگی حاضیرلانیب. آنجاق چوخ کئچمه‌دن فارس شووینیزمی موجود دورومدان اورکوب و اوزرینده قدیم تورک سیمووللاری اولان یومورتالارین ییغیشدیریلماسینا دایر گؤستریش وئریب. بو دوروم بیر داها موجود ایران رژیمینین تورک دشمنی اولدوغونو آچیق-آیدین گؤستریر.

آذربایجان تورکلری بو توپراقلارین از‌لی ساکنلریدیر، عصرلرله بو اراضیلرده تورک دولتی حاکم اولوب. بو خالقین تاریخی و مدنیتی همین تورپاقلارلا بوتونلشیب. بئله بیر بؤیوک تاریخ و مدنیته صاحب ملتین وارلیغینی محو ائتمک ایسته‌یه‌ن فارس شووینیزمی ایسه هله ده بو کیمی اوغورسوز جهدلریندن، گؤرونور، ال چکمک ایستمیر.
سون بیر عصردیر کی، ایراندا آذربایجان تورکلرینه قارشی آسیمیلیاسیا سیاستی یورودولمکده‌دیر. اؤلکه‌نین بؤیوک اکثریتینی تشکیل ائد‌ن آذربایجان‌لیلار ابتدائی حقوقلاریندان بئله محروم ائدیلیب. ایران رژیمی هر فرصتی غنیمت سایاراق، مختلف یوللارلا آذربایجان‌لیلارا هجوم ائدیرلر.

بو دشمنچیلیین سببلرینی بلکه ده تاریخ‌ده آختارماق لازمدیر؛ لاکن هر حالدا فارس شووینیزمی آد بئله وئره بیلمدیی دشمنچیلیینی گیزلتمه‌مکله یاناشی، گئنیشله‌نمه‌سی استقامتینده ده الیندن گلنی اسیرگه‌میر. رژیم سون ۱ عصرده بوتون گوج واسطه‌لرین‌دن استفاده ائد‌رک، آذربایجان ملتینین تاریخینی تحریف ائد‌رک، ائلجه ده مدنیتینین محوی استقامتینده مختلف جهدلر گؤستررک ایران آذربایجانیندا یاشایان تورکلری آذری کیمی قله‌مه وئرمه‌یه چالیشیب. آذربایجان‌لیلاری بیر ملت کیمی رسمی شکلده تانیماقدان یایینان فارس شووینیزمی تورکون تاریخ و مدنیتینی عکس ائتدیرن هر بیر سیموول و عادت-عنعنه قارشی‌سیندا تشویشه دوشور، اؤز تورکفوبیا صفتینی نمایش ائتدیریر.

بو دفعه ایسه مرکزچی فاشیستلرین رسام فاطمه داداشزاده‌نین حاضیرلادیغی و تبریز بلدیه‌سینین تشکیلاتچی‌لیغی ایله قدیم تورک یازیلارینین حک اولوندوغو یومورتا فیقورلارینین تبریزده سرگیه قویولماسینا هجوم ائتمه‌لرینین شاهدییک.

مرکزچی قوه‌لر بو تیپ هجوملارین نتیجه وئرمدیینی، عکسینه، ایچ اوزلرینی هر کس اوچون اوزه چیخاردیغینی هله ده باشا دوشمه‌ییبلر. آذربایجان خالقی گون کئچدیکجه اؤز تاریخ و مدنیتینه داها خصوصی دقت یئتیریر، ملی دیرلرینی منیمسییر. بو دورومون تورک فوبیاسی اولان هر بیر کسی تشویشه سالماسی نرمالدیر. رئاللیقدان، تاریخی حقیقتدن ایسه قاچماق ممکونسوزدور. آذربایجان خالقی بوتون بو باسقیلارا باخمایاراق اؤز کیملیین قورویوب و قورویاجاقدیر.

بیز تاریخه سیغیشماریق - دونه‌ن واردیق، بو گون واریق…