تبریزده باخیم‌سیز قالان و داغیلماق اوزره اولان اونلارلا تاریخی عابده و ائو آراسیندا باباخان ائوی کیمی تانینان بینا تامامیله محو اولماق اوزره‌دیر.

Kult.az خبر وئریر کی، بو باره‌ده یئرلی مدنی فعاللار معلومات یاییب.

اونلارین بیلدیردیینه گؤره، بوندان اول تاریخی باباخان ائوینین قونشولوغوندا سؤکونتو ایشلرینین آپاریلماسی ائوین بیر حیصه‌سی‌نین اوچماسینا سبب اولوب.

"هله ۲۰۲۰-جی ایلین مای آییندا باش وئره‌ن حادثه‌دن سونرا تبریز شهرینین علاقه‌دار دولت قوروملاری و مدنی ارث تشکیلاری باباخان ائوینین قورونماسی و برپاسینا سؤز وئردیلر، آنجاق بو گونه کیمی عابیدنین برپاسی اوچون ایش گؤرولمه‌ییب و تاریخی ائو یوخ اولماق تهلوکه‌سی ایله اوز-اوز‌دیر"،- اونلار بیلدیریبلر.

مدنی فعاللارین دئدیینه گؤره، بو مدت عرضینده قاجارلار دوورونون معمارلیق نمونه‌لریندن ساییلان، ۲۰۰۸-جی ایلده ایران میللی اثرلری سیاهیسین‌دا قیده آلینان ۱۶۰ ایللیک تاریخی ائوین برپاسی ایله باغلی ائدیلن مراجعتلره اهمیت وئریلمه‌ییب.

قید ائدک کی، شرقی آذربایجان‌دا بو گونه کیمی تانینان و قیده آلینان تاریخی عابده‌لرین سایی ۱۸۰۰-دن چوخ اولماقلا، بو ساحه‌ده ایراندا ان چوخ تاریخی عابده‌یه مالیک اولان ۵ ایالت آراسیندا یئر آلیر.

تبریزده ۶۰۰-دن چوخ تاریخی تیکیلی، عابده و ائوین مووجود اولماسینا باخمایاراق، اونلاردان بیر چوخو داغیدیلیب، باخیم‌سیز قالیب و یا داغیلماق اوزره‌دیر.