بو گون تبریزلی فوتوژورنالیست و صنعتچی رضا دقتی نین دوغوم گونودور.
Kult.az خبر وئریر کی، رضا دقتی ۲۶ ایول ۱۹۵۲-جی ایلده تبریزده آنادان اولوب.
ایلک شکلینی ۱۴ یاشیندا چکن رضا بو فوتوسونو مکتبده فعالیت گؤسترن پرواز آدلی ژورنالدا یاییملاییب.
ابتیدایی تحصیلینی تبریزده بیتیردیکدن سونرا تهران دولت اونیورسیتهسینده معمارلیق اوزره تحصیلینی داوام ائتدیرن دقتی، سیاسی فعالیتینه گؤره ۲۲ یاشیندا شاه رژیمی طرفیندن ۳ ایل مدتینده حبس اولونوب، ۵ آی تکآداملیق کامئرادا ایشگنجهلره معروض قالیب.
۱۹۷۹-جو ایل ایران انقیلابیندان سونرا دا فعالیتلرینی داوام ائتدیرن تبریزلی صنعتچی تضییقلرله اوزلهشدیی اوچون ۱۹۸۱-جی ایلده اؤلکهدن چیخماغا، فرانسایا گئتمهیه مجبور اولوب.
او، ۱۹۹۱-جی ایلدن اعتباراً فرانسا میللی جغرافییا جمعیتی ایله امکداشلیغا باشلاییب، جمعیتین بیر چوخ لاییحهلرینی حیاتا کئچیریب.
اونون چکدیی شکیللر ۲۵ ژورنالین اوز قابیغی اولوب. ۱۹۹۲-جی ایلده اؤز حیات یولداشی یازیچی رئیچل دقتی ایله بیرلیکده پاریسده "Webistan فوتو" آگئنتلیینین اساسینی قویوبلار.
تانینمیش فوتوژورنالیست آذربایجانا ایلک دفعه ۱۹۸۷-جی ایلده سفر ائدیب. ۱۹۹۷-جی ایلده ایسه بیر نئچه آی آذربایجاندا یاشاییب، اؤلکهنی گزهرک ساده انسانلارین گوندهلیک حیاتینی، معیشتینی، عادت-عنعنهلرینی فوتولاردا ابدیلهشدیریب.
رضا دقتی ۲۰ یانوار حادثهلرینی او جملهدن ده خوجالی سویقیریمینین شاهیدلرینی ائلجه ده شهیدلرینی چکمهیه مووفق اولوب.
قاراباغدا چکدیی فوتولاری پاریسده سرگیلهین رضا دقتییه قارشی فرانسا مطبوعاتیندا اونلارلا یازی درج اولونوب، اؤزو حدلهنیب، سرگیسی ایسه ارمنی هجومونا معروض قالیب.