ایران یازیچیلار بیرلییی ۲۱ فئورال بین‌الخالق آنا دیلی گونو مناسیبتیله یایدیغی بیانات‌دا ایران‌دا غیری-فارس دیللره و آنا دیلی ساحه‌سینده فعالیت گؤستره‌ن مدنی فعاللارا قارشی تضییقلری پیسله‌ییب.

Kult.az خبر وئریر کی، بیانات مؤلفلری مدنی محبوسلارین سربست بوراخیلماسینی طلب ائدیبلر.

"اؤلکه‌نین سرحدیانی ایالتلرینده وطنداش، مدنی و آنا دیللری ساحه‌سینده چالیشان فعاللارا قارشی باشلادیلان حبس دالغاسی گوجله‌نیب. سون آیلاردا تورک، عرب، بلوچ و کورد وطنداشلارینین زوراکی و اؤزباشینا حبسلری، رسمی دیلدن باشقا بیر دیلده دانیشان ایالتلرده مدنی فعاللارا قارشی دوشمن و ردوکسیونیست باخیشینین باریز ثبوتودور»،- بیانات‌دا بیلدیریلیب.

یازیچیلار بیرلییی رسمی دیلدن (فارسجا- رئد) باشقا دیللرین قاداغان ائدیلمه‌سینی آیری-سئچکیلیین، آزاد سؤز و فکره قارشی دشمن مناسیبتین نمونه‌سی آدلاندیریب، بونون آجی نتیجه‌لری باره‌ده خبردارلیق ائدیب.

"آنا دیللری ساحه‌سینده چالیشان بوتون ملکی و مدنی فعاللارا قارشی هر هانسی محدودیتین، آیری-سئچکیلیین، حبسین و غیری-قانونی تعقیبلرین آرادان قالدیریلماسینی طلب ائدیریک"،- یازیچیلار بیرلیینین بیاناتیندا وورغولانیب.