دنیانین ان گؤزل انسانی هالیوود آکتریساسی دمی مور سئچیلیب.

Kult.az خبر وئریر کی، "ان گؤزل انسان" ریتینگی هر ایل "پوپل" ژورنالی طرفیندن درج ائدیلیر.

بو ایل نشرین رداکسییاسی ۶۲ یاشلی دمی مورو پلانتین ان گؤزل انسانی اعلان ائتمکله کفایتله‌نمه‌ییب، هم ده اونونلا گؤزللیک و آکتیورلوق کاریراسی حاقیندا صحبت آپاریب. اکران اولدوزو بیلدیریب کی، الده ائتدیی ان بؤیوک آزادلیق اؤزونو تام شکلده اولدوغو کیمی قبول ائتمه‌سینده‌دیر.
"بو، کیم اولدوغومو هر گون قبول ائتمک حسی‌دیر. بو او دئمک دئییل کی، منه خوش گلن حصه‌لری قبول ائدیرم. بو او دئمکدیر کی، من اؤزومون بوتون حصه‌لرینی قبول ائدیرم"، - دئیه مور وورغولاییب و یاشلا بیرلیکده گؤرونوشونده باش وئرن بوتون دییشیکلیکلری قبوللاندیغینی علاوه ائدیب.

قید ائدک کی، "پوپل" ژورنالی هر ایل "ایلین ان گؤزل انسانی" خصوصی بوراخیلیشی حاضرلاییر. اولکی ایللرده ژورنالین اوز قابیغین‌دا جولیا روبرتس، میشل پفایفر، سوفیا ورگارا، سیندی کرووفورد، جودی فوستر، مگ رایان، مل گیبسون، کورتنی کوکس، توم کروز، لئوناردو دیکاپریو، نیکول کیدمان، بیونس کیمی اولدوزلار یئر آلیبلار.