مایین ۵-ده باکی‌دا رشید بهبودوو آدینا ماهنی تئاترین‌دا تبریزلی موسیقی‌چی، گارمون ایفاچی‌سی علی حق‌شناسین آنیم گئجه‌سی کئچیریلیب.

Kult.az خبر وئریر کی، مراسیم اونون او تایلی، بو تایلی دوستلاری و صنعت یولداشلارینین تشببوسو ایله باش توتوب.

۳ ساعت‌دان چوخ چکهن آنیم گئجه‌سین‌ده آذربایجان رسپوبلیکاسی و گونئی آذربایجان‌دان اولان موسیقی‌چیلر، صنعت آداملاری، یازیچیلار و علی حق‌شناسین صنعت دوستلاری چیخیش ائدیب، ماهنیلار سسلندیریبلر.

تدبیره علی حق‌شناسین آمریکا، کانادا، کلمبیا، آلمانیا، اسوچره و تبریزدن اولان ۳۰-آ یاخین دوستو، همچینین آمریکادا یاشایان حیات یولداشی و عائله عضولری ده اشتراک ائدیب.

قید ائدک کی، علی احمد اوغلو حق‌شناس ۱۹۶۱-جی ایل آپرلین ۳۰-دا تبریز شهرین‌ده آنادان اولوب. ۲۰۰۰-جی ایلده‌ن آمریکانین تکزاس اشتاتینین هیوستون شهرینده یاشاییب. اؤزو کوندیسیونر متخصصی اولسا دا، کلاسیک موسیقیمیزین، بسته‌کار و خالق ماهنیلاریمیزین وورغونو، مشهور قارمون ایفاچیسی اولوب.

علی حق‌شناس ۱۹۸۹-۱۹۹۵-جی ایللرده تبریزده حبیب فرشبافین مکتبین‌ده گارمون درسی دئیه‌رک، بو اعجازکار موسیقی آلتینین، زنگین خالق موسیقیمیزین سیرلرینی گنجلره اؤیردیب. عینی زمان‌دا، ۲۰۰ صحیفه‌لیک «گارمون مکتبی» آدلی کتاب یازاراق، ترتیب ائتدیی بو اثردن اؤزو درس دئدیی مکتب‌ده استفاده ائدیب.

او، اوزون سوره‌ن خسته‌لیکدن سونرا ۲۰۲۴-جو ایل فورالین ۲-ده دنیاسینی دییشیب