جناب پرزیدنت، بو گون سیزه تکجه فرانسا وطنداشی کیمی دئییل، هم ده شاهد کیمی یازیرام. تخمیناً اللی ایلدیر کی، اولجه ایران‌دا، سونرا ایسه دنیانین هر یئرینده کامرام محاربه‌لری، سویقیریملاری، مجبوری کؤچکونلری و بمباردمانلارین توزوندا قالان اوشاقلارین جسدلرینی سندلشدیریب. بوتون بو ایللرده، بو دنیانین نفرت دولو دؤیوش میدانلاریندا، "صلح مخبری" کیمی انسانلیغین چیرکینلیینی گؤرموشم.

Axar.az خبر وئریر کی، بو سؤزلری فرانسادا یاشایان تبریزلی فوتوگراف رضا دقتی پرزیدنت امانوئل ماکرونا عنوانلادیغی آچیق مکتوبوندا یازیب.

"بوتون بو ایللر عرضین‌ده، ۱۹۸۱-جی ایلدن بری گئری قاییدا بیلمه‌سم ده، ایران‌داکی حادثه‌لری ناراحات بیر اورکله ایزلمیشم. آنجاق بو گون ایران‌دا باش وئره‌نلر باشقا بیر قددارلیق و آمانسیزلیقدیر: رژیم گنجلری، قادینلاری، کیشیلری و اوشاقلاری سیستماتیک شکیلده قیریر. انقلاب کئشیکچیلری سلاحسیز اعتراضچیلاری گوله‌للییر. حبسخانادا گنج قیزلاری زورلاییرلار. شاعرلری آسیرلار. گله‌جه‌یه باخماغا جسارت ائد‌نلرین گؤزلرینی چیخاریرلار.
آیتوللاهلار وطنی‌می قیرغین یئرینه چئویریبلر"،- تبریزلی صنعت‌چی علاوه ائدیب.

او، فرانسانین انسان حقوقلاری دیاری اولدوغونا دقت چکه‌رک، پاریسین ایران‌دا باش وئره‌ن قیرغینی دایاندیرماق اوچون درحال گئنیش بین‌الخالق حرکاتا تشببوس گؤسترمه‌لی اولدوغونو بیلدیریب:

"بین‌الخالق دموکراتییا کوالیسیاسینا چاغیریش ائتمک و بوتون واسطه‌لردن استفاده ائتمک اوچون تام لگیتیملیینیز وار: رژیم لیدرلرینه و اونلارین عائله‌لرینه قارشی سارسیدیجی اقتصادی سانکسیالار، آکتیولرین تمامیله دوندورولماسی، اؤلکه‌یه گیریشین قاداغان ائدیلمه‌سی، ایشین بین‌الخالق جنایت محکمه‌سینه گؤندریلمه‌سی، رپرسیو تکنولوگییالارا امبارقولار قویماق، مستقل ایران مدیاسینا لوجستیک دستک وئرمک، سیاسی قاچقینلاری قبول ائتمک و بیرلشمیش ملتلر تشکیلاتین‌دا دایمی تریبونا یاراتماق کیمی آددیملار آتماغینیز گؤزلنیلیر".

تبریزلی فوتوگراف امانوئل ماکرونو مکتوبونو بو سؤزلرله بیتیریب:

"جناب پرزیدنت، سیزدن خواهیش ائدیره‌م کی، ویکتور هوگونون، زولانین و فرانسانی مظلوملارین سسی ائد‌نلرین هامی‌سینین ارثینی حرمتله یاد ائدین. بو مبارزه‌یه رهبرلیک ائدین. واخت آزدیر. هر کئچن گون داها چوخ انسان اؤلدورولور. اونلارین طلب ائتدیی آزادلیق عابده‌لریمیزه حک اولونموش عینی آزادلیق‌دیر.

بو آزادلیق سرحد تانیمیر".