تورکیه آمریکانین ایرانا حربی مداخله‌سینین علیه‌ینه‌دیر. تورکیه‌نین سیاسی دایره‌لرینی آنلاماق اولار. آمریکانین واختیله عراقا و سوریایا حربی مداخله‌لری تورکیه‌یه جدی پروبلملر یاراتدی. اونا گؤره ده آنکارادا حساب ائدیرلر کی، آمریکانین ایرانا ممکن مداخله‌سی تورکیه‌یه علاوه پروبلملر یاراداجاق. بو سبب‌دن آنکارا مداخله سناریسینین قارشی‌سینی آلماق اوچون واشینگتنلا تماسلاری یوغونلاشدیریب.

Axar.az خبر وئریر کی، بو باره‌ده پولیتولوگ الخان شاهینوغلو قید ائدیب.

او بیلدیریب کی، اؤز نوبه‌سین‌ده تهران آنکارانین امکانلاریندان استفاده ائتمه‌یه قرار وئریب:

«آمریکا پرزیدنتی دونالد ترامپ ایران‌دا باش وئره‌ن قتلعاملار فونوندا ایران رسمیلری ایله تماسلارا آرا وئردیینی اعلان ائتدیکدن سونرا تهران آنکارایا مراجعت ائدیب. ایران و تورکیه خاریجی ایشلر ناظرلری عباس عراقچی و هاکان فیدان ۲۴ ساعت عرضینده ایکی دفعه تلفنلا دانیشیبلار. تهران آنکارانین واشینگتنو مداخله سناریلریندن امتنا ائتمه‌یه ایناندیرماسینی ایستییر. هاکان فیدان عباس عراقچی ایله دانیشیقلاردان سونرا آمریکانین آنکاراداکی سفیری و سوریا اوزره خصوصی نماینده توم باراکلا گؤروشوب. توم باراک سفیر اولماقلا یاناشی دونالد ترامپین یاخین دوستودور و اونون دولت کاتیبینین باشی اوزریندن پرزیدنتله بیرباشا تماس امکانی وار. باراک آنکارانین ایستیینی ترامپا چاتدیراجاق. آنجاق آمریکا پرزیدنتی ایرانا مداخله قراری وئررسه، تورکیه‌نین ماراقلارینی نظره آلمایاجاق. تورکیه ایران‌دا تلاطم‌لرین سنگیمه‌سینی و بو دولتین اراضی بوتولویونو دستکله‌سه ده، قارداش اؤلکه‌ده ایران‌داکی رژیمین ایللر بویو پ.کا.کا-نی دستکلدیینی ده اونوتماییبلار»، - او وورغولاییب.