اسرائیل آمریکانین ایرانلا آپاریلان دانیشیقلارداکی موقعیی باره‌ده داها چوخ معلومات الده ائتمه‌یه چالیشیب، بو زمان معلومات توپلاما اصوللاریندا اجازه وئریله‌ن حدی کئچیب.

Axar.az خبر وئریر کی، بو باره‌ده «نیو یورک تایمز» منبع‌لرینه استنادن معلومات یاییب.

منبع‌لرین سؤزلرینه گؤره، اسرائیل و آمریکا اوزون مدتدیر بیر-بیرینی ایزله‌ییر و جاسوسلوق فعالیتی ایله مشغول اولور، هر ایکی طرف ده بو فعالیتلردن خبرداردیر و بونا معین درجه‌ده گؤز یومور. لاکن اسرائیل آمریکانین ایرانلا دانیشیقلارداکی موقعیی باره‌ده معلومات الده ائتمه‌یه چالیشارکه‌ن «قیرمیزی خطی" کئچیب.

بیلدیریلیب کی، آمریکا کشفیاتی اؤلکه رهبرلیینی اسرائیلین آمریکانین یوکسک وظیفه‌لی مأمورلاری، او جمله‌دن پرزیدنتین خصوصی نماینده‌سی استیو ویتکاف، مدافعه ناظیرینین سیاسی مسئله‌لر اوزره معاونی ائلبریج کولبی و دیگر شخصلرله باغلی ایزله‌مه و معلومات توپلاما فعالیتینی گوجلندیردیی باره‌ده خبردار ائدیب.

نشر قید ائدیر کی، آمریکا اردوسو اسرائیل طرفینه چوخلو تاکتیکی و اپراتیو معلومات وئرسه ده، اسرائیل خصوصیله آمریکا پرزیدنتی دونالد ترامپین ایرانلا دانیشیقلارداکی استراتگیاسی ایله ماراقلانیب.

حتی وورغولانیر کی، اسرائیلین جاسوسلوق فعالیتی ترامپین ایکینجی پرزیدنتلیک دورونده داها چوخ نظارتدن چیخیب.