م.ح.پ لیدری دولت باخچالی تورکیه‌ده حجاب مسئله‌سی اوزریندن آذربایجانا قارشی هجوملاری قیناییب. بیان ائدیب کی، بو، آذربایجانین داخلی مسئله‌سی‌دیر: «هر بیر تورک رسپوبلیکاسی اؤز داخلینده مستقل و سووئرن دولتدیر. تورک دولتلری آراسینداکی امکداشلیق بو سووئرنلیک آنلاییشینی اساس گؤتورور، قارشی‌لیقلی حرمت، برابرلیک و اورتاق ماراقلار اساسیندا انکشاف ائدیر». باخچالی اساس دقتین تورک دنیاسیندا بیرلییه یؤننیلدیلمه‌سی چاغیریشینی ائدیب.

تورکیه‌ده آذربایجانی دستکله‌یه‌نلر هر زمان ملی کسیم اولوب. بیرینجی قاراباغ محاربه‌سینده تورکیه حکومتی آذربایجانا دستک وئرمه‌دیی حالدا، ملتچیلر جبهه‌ده دؤیوشوردولر. آ.ک.پ ده حاکمیته گلنده آذربایجانلا مناسبتلر ایندیکی سوییه‌ده دئییلدی. تورکیه و ارمنستان آراسیندا «فیتبول دیپلماتیاسی» و «سوریخ پروتوکوللاری» بونون تاریخی نمونه‌لریندندیر. تورکیه‌ده بونا اعتراض ائد‌ن و قارشی‌سینین آلینماسیندا رول اوینایانلار ملتچیلر اولدو.

آذربایجانلا تورکیه آراسیندا سیاسی ائلیتانین یاخینلاشماسی خصوصیله ۲۰۱۰-جو ایلدن سونرا باشلادی. بو مسئله‌ده ده م.ح.پ رول اویناییب. همین واخت تورکیه‌نین خارجی سیاستینده مستقل خط اؤنه چیخیر، آ.ک.پ و م.ح.پ آراسیندا معین یاخینلاشمالار مشاهده ائدیلیردی. داها سونرا م.ح.پ-نین آ.ک.پ ایله عینی جبهه‌ده یئر آلماسی باکی-آنکارا خطینده سیاسی باغلاری داها دا گوجلندیردی.

بو گون تورکیه حاکمیتینده ده تمثیل اولونان معین دینی گروپلارین آذربایجان علیه‌اینه چیخیشلاری ایکی اؤلکه آراسینداکی باغلاری قوپارماق گوجونده دئییل. چونکی تورکیه اجتماعیتینده ملتچی کسیم آذربایجانین یانیندادیر، سکولیارلارین دا گئنیش دستیی مشاهده ائدیلیر. م.ح.پ-نین حاکم «جمهور اتفاقی»نین، هم ده تورکیه دولتینین اساس ستونلاریندان اولماسی ایسه باکییا تکجه اجتماعی یوخ، هم ده سیاسی دستک دئمکدیر.

باخچالی آذربایجانی مدافعه ائتمکله بونون مساژینی وئردی.