اسرائیلده سون سئچکیلرین نتیجه‌لری اؤلکه‌نین سیاسی حیاتینین نه قدر حساس دنگه اوزرینده قورولدوغوندان خبر وئریر. سئچکیلره قاتیلان بلوکلاردان هئچ بیری ۱۲۰ مانداتلی کنستده حکومت قورماق اوچون طلب اولونان ۶۱ ماندات الده ائده بیلمه‌دی.

بو سؤزلری Axar.az-آ آچیقلاماسیندا سیاسی شرحچی حیدر اوغوز اسرائیلده کئچیریله‌ن سئچکیلری شرح ائدرکه‌ن دئییب.

«ایندیکی باش ناظیر بنیامین نتانیاهونون رهبرلیک ائتدیی بلوک، سون معلوماتا گؤره، ۵۳، مخالفت بلوکو ۴۸، عرب پارتییالاری ایسه ۱۹ ملت وکیلی چیخارا بیلیب. نتیجه‌ده یئنی حکومتی قورماق هئچ بیر بلوکا نصیب اولماییب. حالبوکی بلوکلارین هر بیری ۵-۶ پارتییادان تشکول تاپیر.

سئچکیلرین ایندیکی نتیجه‌لرینه گؤره، حکومت قورماق ایسته‌یه‌ن بلوکلاردان هر هانسی بیری یا مسلمان عربلرله امکداشلیق ائتمه‌لی، یا دا دیگر بلوکا داخل اولان پارتییالاردان ان آزی ۱-ی ایله یئنی اتفاق قورمالیدیرلار. بو دا ایستر-ایستمز اسرائیلین یئنی حکومتینی داها حساس وضعیته گتیریر. ایسته‌نیله‌ن کیچیک بیر ناراضیلیق ۷-۸ پارتییالی کوالیسییا حاکمیتینین پارچالانماسینا و سیاسی بحرانین یاشانماسینا یول آچا بیلر»، - او بیلدیریب.

پولیتولوقون فکرینجه، اسرائیلده‌کی سون سئچکیلرده ان چوخ اوغور قازانان گروپ مسلمان عربلر اولوب:

«اؤتن پارلامنت سئچکیلرینده اونلار ۱۰ یئر قازانمیشدیلارسا، بودفعه‌کی سئچکیلرده مسلمان ملت وکیللرینین سایی، سون معلوماتا گؤره، ۱۹-آ یوکسلیب. بو ایسه هارداسا ۹۰% آرتیم دئمکدیر.

بوندان علاوه، اسرائیلده سئچکیلره قاتیلمایان اورتادوکس یهودیلرین ده سایی کفایت قدر چوخدور. معلوماتا گؤره، تخمیناً ۱۰ میلیونلوق اسرائیل اهالی‌سینین ۱.۲ میلیونونو اورتادوکس اینانجلیلار تشکیل ائدیر. یعنی اؤلکه اهالی‌سینین ۱۲%-ی. مسلمانلارین سایی ایسه ۲ میلیوندور. اوست-اوسته توپلایاندا بئله چیخیر کی، اهالینین ۳۲%-ی ایندیکی رسمی سیاستی بینمیر، رژیمین تمامیله ایفلاسینی آرزولاییر.

بو دا آزمیش کیمی، اسرائیلده دموگرافیک آرتیم دا مسلمانلارین و اورتودوکس یهودیلرین خیرینه‌دیر. بعضی احتماللارا گؤره، ۲۰۵۰-جی ایله قدر اورتودوکس یهودیلرین سایی اسرائیل اهالی‌سینین ۳۵%-نه یوکسه‌له‌جک. یعنی ایندیکیندن ۳ دفعه چوخ اولاجاق. مسلمانلارین دوغوم نسبتی ده اسرائیلین عمومی دموگرافیک آرتیمینین اوستونده‌دیر. بئله چیخیر کی، ۲۰ ایل عرضینده اسرائیلده اهالینین ۶۰%-دن چوخو صهیونیست رژیمین تمامیله علیه‌اینه اولاجاق و نتیجه‌ده اردو گوجو تمامیله ضعیفله‌یه‌جک».

حیدر اوغوز حساب ائدیر کی، اسرائیلده قورولان حکومتلرین اولدوقجا آگرسیو سیاست یوروتمه‌سینین اساس سببی ده اونو گؤزله‌یه‌ن بو تهلوکه ایله بیرباشا باغلیدیر:

«اساساً، صهیونیست دوشونجه‌لی یهودیلر اونا گؤره اؤلکه‌لرینین مسلمان اهالیدن «تمیزله‌نمه‌سینی» ایستییرلر کی، اونلار بیر مدتدن سونرا اسرائیلین تمامیله دپولیتیزاسییا اولوناجاغیندان چکینیرلر. سون سئچکیلرده نتیجه‌لری ده اونلارین اندیشه‌لرینی آرتیریر. محض بو سببدن ده هانسی بلوکون حاکمیت کورسوسونده اوتورماسیندان آسیلی اولمایاراق، نوبتی حکومت دؤورونده بیز داها آگرسیو صهیونیست سیاستله قارشیلاشا بیلریک».