پولشانین بیرلشمیش ملتلر تشکیلاتیندکی دائمی نماینده‌سی کشیشتوف شچرسکی دیپلماتیک میسیاسینی اؤز خواهشی ایله واختیندان اول باشا چاتدیراجاق. اؤلکه‌نین خارجی ایشلر ناظیری رادوسلاو سیکورسکی اونون مراجعتینی تامین ائدیب.

Axar.az خبر وئریر کی، بو باره‌ده پولشا خارجی ایشلر ناظیرلیینین مطبوعات کاتبی ماجیژ وئویور معلومات وئریب.

«پولشانین بیرلشمیش ملتلر تشکیلاتیندکی سفیری کشیشتوف شچئرسکی خارجی ایشلر ناظیری رادوسلاو سیکورسکیدن دیپلماتیک میسیاسینین مدتینین قیسالدیلماسینی خواهیش ائدیب. ناظیر بو مراجعتی تامین ائدیب. سفیر شچئرسکی میسیاسینی آرتیق بو آی باشا چاتدیراجاق»، – دئیه ناظیرلیک نماینده‌سی اکس سوسیال شبکه‌سینده یازیب.

شچئرسکی هله‌لیک بو قرارینین سببلرینی نه سوسیال شبکه‌لرده، نه ده اجتماعی چیخیشلاریندا آچیقلاییب.

او، ۲۰۲۱-جی ایلدن پولشانین ب.م.ت-دکی دائمی نماینده‌سی وظیفه‌سینی توتور. بوندان اول دیپلمات اؤلکه‌نین کئچمیش پرزیدنتی آنژی دودانین آدمینیستراسییاسیندا بین‌الخالق سیاست بوروسونا رهبرلیک ائدیب.

قید ائدک کی، شچئرسکینین دیپلماتیک میسیاسینی واختیندان اول باشا وورماق قراری پولشا دیپلماتییاسیندا دیگر کادر فکر آیریلیقلاری فونوندا باش وئریب. اوکتیابرین ۳۰-دان ۳۱-نه کئچه‌ن گئجه پولشانین چین و رومینیاداکی سفیرلری ده وظیفه‌لرینده فعالیتلرینی داوام ائتدیرمک نیتینده اولمادیقلارینی آچیقلاییبلار.

اونلار بو قرارلارینی کونستیتوسیا محکمه‌سی اطرافیندا یارانان موناقیشه‌ده حکومتین موقعیی ایله راضیلاشمامالاری ایله علاقه‌لندیریبلر.