سی ان ان تلویزییاسی دونالد ترامپین پرزیدنت اولمازدان اؤنجه روسییا حاقین‌دا دیله گتیردیی سرت آچیقلامالاری توپلاییب.

آخار. آذ خبر وئریر کی، ۲۰۱۴-جو ایلده «فوکس نیوز» تلویزییاسینا موصاحیبه‌سین‌ده ترامپ روسییا حاقدا دانیشارکن آمئریکا پرزیدنتلیینه کئچمیش نامزد میت رومنینین فیکیرلری ایله راضیلاشیر. ائله همین وئریلیشده ترامپ روسییانی آمئریکانین بیر نمره‌لی گئوسییاسی دوشمنی آدلاندیریر:

«میتین روسییا حاقیندا دئدیکلری دوغرودور. روسییا بیزیم ان بؤیوک پروبلمیمیزدیر. بعضی مطبوع اورگانلار رومنینین فیکیرلرینه گولورلر. سونرادان بللی اولدو کی، او، تامامیله حاقلی‌دیر. باخین گؤرون روسییا ایرانلا نه ائدیر. اونلار سورییادا و دئمک اولار کی، هر یئرده وضیعته نظارت ائدیرلر. بیزی هر یئردن قوووبلار».

بونا بنزر فیکیرلری ترامپ عینی ایلده ان بی سی تلکانالین‌دا دا سسلندیریب. بو دفعه او، روسییایا قارشی سانکسییالارین تطبیقینی ایستییر:

«بیز گرک سانکسییالار تطبیق ائدک. گوج نوماییش ائتدیرملییک. پوتین اوبامانی آلدادیب».