اسرائیل حکومتینین قوندارما «ارمنی سویقیریمی» ایله باغلی بو گون قرار قبول ائتمه‌سی و کنئسستین تصدیقینه گؤندرمه‌سینه ارمنیستان حکومتینین، مخالفتینین و مدیاسینین رئاکسیاسی چوخ شئی دئییر.

Axar.az خبر وئریر کی، بو معلومات ایلک یاییلان‌دا بئله ارمنستان خارجی ایشلر ناظری «هئچ بیر شرحیمیز یوخدور» دئیه، هر هانسی مناسبت بیلدیرمکدن امتنا ائتمیشدی.

سبب ایسه اودور کی، نیکول پاشینیان حکومتی ارمنستانی اساس قونشولاری - تورکییه و آذربایجانلا دشمن ائد‌جک و مناسبتلری گرگینلشدیره‌جک بوتون ادعالاردان ال چکمک سیاستی یئریدیر.

پاشینیان آنلاییر کی، «ارمنی سویقیریمی» آنلاییشیندان بیر چوخ اؤلکه تورکییه‌یه تضییق واسطه‌سی کیمی استفاده ائدیب، ارمنیلر ساده‌جه بوردا استفاده ائدیلیب-آتیلیبلار.

پاشینیان حکومتی اونا گؤره قاراباغ ادعاسیندان ال چکدی و قوندارما «ارمنی سویقیریمی»نین دنیادا تانینماسی استیقامتینده اون ایل‌لردیر آپاریلان سیاست‌دن امتنا ائتدی. ایندی کیمسه «ارمنی سویقیریمی»ندان سوء-ایستیفاده ائتمه‌یه چالیشیرسا، پاشینیان ساده‌جه سوسماقلا بو جهدین نتیجه‌سیزلییی و ارمنستانا هئچ بیر فایدا وئرمدیینی نمایش ائتدیریر.

اسرائیل حکومتینین ده آددیمینا بو گون ارمنستان حکومتی بو جور رئاکسییا وئریلدی. و نه قدر غریبه ده اولسا، بو گون اسرایل حکومتینین بو آددیمی ارمنی مئدیاسینین دا اساس خبرینه و شرحلرینه چئوریلمه‌دی، حتی ارمنی مخالفتی ده بو حادثه‌نی حاللاندیرماقلا، «خال قازانماق» ایسته‌مه‌دی، چونکی بو اویونون نتیجه‌سینی یاخشی آنلاییر.

اسرائیل حکومتی بو آددیملا ارمنستانی «قازانمادی»، هئچ بیر نتیجه‌سی اولمادیغیندان، تورکییه‌یه ده هانسی‌سا «سارسیدیجی ضربه» وورا بیلمه‌یه‌جک. بو آددیم یالنیز و یالنیز آذربایجانی اییترمک‌دن باشقا بیر ایشه یارامیر.

آذربایجان تورکییه ایله استراتژی متفیق‌دیر، قارداشدیر، اسرائیل ایسه آذربایجانین پارتنیورودور.

آذربایجان تورکییه و اسرائیل آراسیندا سیاسی و اقتصادی گرگینلیکلره قاریشماماغا، ممکن اولدوقجا بو گرگین‌لییی یومشالتماغا چالیشان اؤلکه‌دیر، چونکی بو گرگینلیک رسمی باکینین ملی ماراقلارینا خدمت ائتمیر. اما ارمنستان و ارمنیلرله باغلی ایسته‌نیله‌ن مسئله هم ده آذربایجانا توخونور.
بو باخیم‌دان آذربایجان قوندارما «ارمنی سویقیریمی» مسئله‌سینه تورکییه دئییل، هم ده اؤز پنجره‌سیندن باخیر. چونکی قوندار"ارمنی سویقیریمی» دئییلن عرفه‌ده سویقیریما معروض قالان محض آذربایجان تورکلری اولوب: باکی‌داکی دهشتلی مارت قیرغینلارینی، قوبادا، ناخچیوان‌دا، قاراباغدا، شاماخی‌دا قتلعاملاری ارمنیلر تؤردیب.

ارمنیلر هم ده خوجالی سویقیریمینی حیاتا کئچیریبلر و «دوننکی» ساییلا بیله‌جک بو حادثه‌نین نینکی شاهیدلری ساغدیر، سندی-ثبوتو وار، هم ده کادرلاری، گؤرونتولری اورتادادیر. اسرائیل سندلی-ثبوت‌لو خوجالی سویقیریمینی تانیماییب، ۱۱۱ ایل اول اولمایان، قونداریلان، یالانچی، ساختا، هئچ بیر فاکتا اساسلانمایان «تاریخی حادثه‌نی» «تانیماغا» قالخیرسا، البته کی، آذربایجان‌لیلاری معنوی باخیم‌دان اینجیتمیش اولور.

اسرائیلین هئچ بیر مسلمان اؤلکه‌سی ایله علاقه‌لری آذربایجانلا اولدوغو سویه‌ده دئییل. آذربایجان خالقینین سون درجه تولرانت‌لیغی ایکی خالق و اؤلکه آراسیندا ایستی مناسبتلرین اساسینی تشکیل ائدیر. آذربایجان دولتینین اسرائیل دولتینه مناسبتی ده خالقلار آراسینداکی خوش علاقه‌لره دایانیر.

اسرائیل آذربایجانلا مناسبتلری داها دا انکشاف ائتدیرمک و بونو مسلمان اؤلکه‌لرینده نمونه‌یه چئویرمک عوضینه نوبتی جدی سهوینی ائتدی.

اسرائیل حکومتینین بو عدالتسیز آددیمی اسرائیله اعتمادی جدی شکیل‌ده سارسیداجاق، اونسوز دا آذربایجان خالقی غزه قتلعامینا گؤره اسرائیل‌دن بؤیوک خیال قیریقلیغی یاشاییر.

امید ائدک کی، هئچ اولماسا، کنست حکومتین قرارینی دستکله‌مه‌یه‌جک و آذربایجانلا مناسبتلرین اوستوندن تمامیله خط چکه‌سی بو سیاستی دوردوراجاق.