تورکیه‌نین آذربایجانداکی سابق سفیری، تورک آغساققاللاری بیرلیینین تورکیه و تورک دنیاسی اوزره هم‌صدری هولوسی کیلیچ قارداش اؤلکه‌ده بعضیلرینین بیرلشمیش ملتلر تشکیلاتی باش آسامبلیاسیندا اسرائیل باش ناظیری بنیامین نتانیاهونون چیخیشی زمانی آذربایجان نماینده هیئتی عضوونون زالدان چیخماماسینا گؤره آذربایجانا قارشی قارا کامپانیایا اعتراض ائدیب.

Axar.az خبر وئریر کی، هولوسی کیلیچ بو اعتراضینی سوسیال شبکه حسابیندا «جان آذربایجانا سالدیرانلارا مساژیم» آدی ایله پایلاشیب.

«- تورکیه و آذربایجان خالقلاری بیر عائله‌دیر؛ بونا گؤره ده اونلار واحد بیر ملتدیر.

- جان آذربایجانیمیزا یؤنلمیش عدالتسیز، مسئولیتسیز و معلوماتسیز تنقید و هجوملار، اصلینده، عائله‌میزه یؤنلمیشدیر. بو عدالتسیز، مسئولیتسیز و معلوماتسیز هجوملار یالنیز بیزی سئومه‌یه‌نلری سئویندیرمکده‌دیر.

- تورکیه-آذربایجان قارداشلیغی عصرلره سؤیکه‌نه‌ن قارداشلیقدیر. بو، ۱۹۱۵-جی ایل چاناققالا محاربه‌سی زمانی مینلرله آذربایجانلی قارداشیمیزین تورک عسگرلری ایله چیین-چیینه دشمنه قارشی ووروشاراق شهید اولماسی ایله نماییش ائتدیریله‌ن تاریخی همرایلیک نتیجه‌سینده محکملنه‌ن و ۱۵ ایون ۲۰۲۱-جی ایلده امضالانیب هر ایکی اؤلکه‌نین پارلامنتلری طرفیندن تصدیقلنه‌ن شوشا بیاننامه‌سی ایله داها دا گوجله‌ندیریله‌ن بیر باغدیر.

- آذربایجان سووئرن و مستقل دولتدیر. او، دیگر دولتلرله اولان استراتژی امکداشلیق، هدفلر و ماراقلار — هم کئچمیش، هم ده گله‌جک — اساسیندا اؤز خارجی سیاستینی معین ائدیر.

هئچ کیمین بو مسئله‌یه قاریشماق و یا بونونلا باغلی شرطلر دیکته ائتمک حقوقو یوخدور».