سانکسییالار ایرانا ایخراج ائدیلن قیدا و درمان ساحه‌لرینه شامیل ائدیلمیر.

آخار. آذ خبر وئریر کی، بو سؤزلری لوکزامبورگا سفر ائد‌ن آمریکا دؤولت دپارتامنتین‌ده یارادیلمیش ایران مسئله‌لری ایله باغلی اؤزل ایشچی قروپونون رهبری برایان هوک دئییب. او، ایرانا قارشی سانکسییالاردان و رسمی تهرانین مسئله نین ماهیتی ایله علاقدار اؤز وطنداشلارینی آلداتماسیندان دانیشیب:

«ایرانا قارشی سانکسییالارین تطبیق ائدیلمه‌سین‌ده مقصد، ایرانلا هومانیتار ساحه‌لرده تیجارته، او جمله‌دن ده ایرانلا قیدا و درمان تیجارتینه منفی تأثیر گؤسترمک و یا اونو محدودلاشدیرماق دئییل. بیر داها بیلدیریریک کی، سانکسییالار ایرانا ایخراج ائدیلن قیدا و درمان ساحه‌لرینه شامیل ائدیلمیر. یئنی سانکسییالاری تطبیق ائدرکن، آمریکا حکومتی ایران میللتینین خیرینه اولان بعضی استثنا حاللاری اولجه‌دن نظره آلیب. لاکین اؤز میللتینین ایلکین احتیاجلارینی تعمین ائتمکدن آجیز قالان و اؤلکه‌ده یارانمیش اقتصادی چتینلیکلرین اساس سببکاری ساییلان ایران دولتی سانکسییالارین ماهیتی باره‌ده اؤز خالقینا یالان دانیشیر، اونلارا سهو معلومات وئریر.

حاضردا یوزدن چوخ بین الخالق شیرکت ایرانی ترک ائد‌رک بو اؤلکه ایله تیجارت علاقه‌لرینه سون قویوبلار. مسئله اوندادیر کی، سیز ایرانلا اقتصادی امکداشلیغا گیرنده حقیقتا ده بیلمیرسینیز کی، سیزینله ایران آراسیندا اولان بو امکداشلیق عادی بیر تیجارت علاقه سدیر، یوخسا کی، سیز بو امکداشلیقلا بین الخالق تروریزمه مالییه یاردیمی گؤسترمکدسینیز. محض بونا گؤره ده، خاریجی شیرکتلر، ایرانلا امکداشلیغین سونراکی فسادلاری ایله باغلی آمریکانین خبردارلیق مئساژینی آلدیقلارینا گؤره، تهرانلا تیجارت علاقه‌لرینی دایاندیراراق بو اؤلکه‌نی ترک ائدیبلر».