آنا صحیفه پلانت |
همداندا ۲۷۰ معدن پارتلاتما یولو ایله ایستیسمار ائدیلیر، لاکین امک ایدارهسی بونلارین یولونون اوزاقلیغینی و اویغون نقلیات واسطهسینین اولماماسینی اساس گتیرهرک بو یئرلرده یوخلاما آپارمیر.
بو بارهده همهدان امک تهلوکهسیزلیگی و ساغلاملیغی آسوسیاسییاسینین صدری مهدی روستمی نیا آچیقلاماسیندا دئییب. روستمی نیا ایش یئرلرینده حکم سورهن تهلوکهلی وضعیت بارهده دانیشاراق همدان ریفاه، امک و سوسیال مسئلهلر باش ایدارهسینین رئیسیندن گیلئیلنیب:
«همدان ویلایتینده ایستحصال ساحهلرینده وضعیت هئچ ده اورک آچان دئییل. مسئول شخصلرین وئردیکلری ایستاتیستیکایا اینانیب هئچ بیر آددیم آتماساق، اوندا ویلایت محو اولوب گئدر. باش ایداره «ریفاه» سؤزونو اؤز آدیندان سیلمهلیدیر. نظارت ائتدیی ایش ساحهلرینده فهلهلر ان پیس وضعیتدهدیر و بیر چوخو ایسه ایشدن چیخاریلیب. همچینین، امک ایدارهسی فهلهلرین مراجعتینه واختیندا جاواب وئرمیر. مثلاً، «خوش نوش» شیرکتینین فهلهلرینین چتین ایش شرایطیندن دولایی اونلارا اؤدنیلمهلی اولان علاوه اؤدنیش حاقدا مراجعته بیر آی ایچینده جوابلاندیریلاجاغینا سؤز وئریلیب. ۲۰ آیدیر، هله جواب وئریلمهییب. کئچمیش رئیس مراجعتلری تئز جاوابلاندیریردی، لاکین یئنی گلن مودیر فهله جاماعاتلا یاخشی داورانمیر. ویلایتین باشقا شهرلرینده وضعیت داها دا پیسدیر. فهلهلرله هفتهلیک ایجلاس کئچیرمهسینی وعد ائدن امک ایدارهسی ایندییه قدر وعدینه عمل ائتمهییب. مؤوجود اولان ایستاتیستیکایا اساساً بو ایلین ایلک ۵ آییندا ۸۵ فهله ایشله باغلی باش وئرهن حادثهلر نتیجهسینده خسارت آلیب. بونلاردان ۱۸-ی دونیاسینی دییشیب. لاکین بو حادثهلر ریفاه، امک و سوسیال مسئلهلر باش ایدارهسی طرفیندن گیزلی ساخلانیر. کئچهن ایل ایسه ایشله باغلی ۲۲۸ حادثه باش وئریب».
قید ائدک کی، ایشچیلرین ایش وضعیتی اولدوقجا آجیناجاقلیدیر. مؤوجود اولان ایش یئرلرینده نه تهلوکهسیزلیک (ایمنی) و ساغلاملیغا رعایت ائدن اولور، نه ده بونا کیفایت قدر نظارت وار. بیر چوخ ایش یئرلری باغلانیب. بونو اثبات ائتمک اوچون هر گون باغلانان ایش یئرلرینین یئنیدن آچیلماسی بارهده خبرلرین باشلیغینا باخماق یئتر.
تاریخ
2019.09.03 / 21:22
|
مولف
Axar.az
|