آمریکا دؤولت دپارتامئنتی، ایرانین کئچه‌ن ایلده‌ن بری بؤلگه‌ده‌کی تئررورچو قروپلاشمالارا راکتلر وئردیینی ادعا ائدیب.

اؤتن گون آمریکا دؤولت دپارتامنتینین ایران اوزره خصوصی نماینده‌سی برایان هوک آمریکا سناتینین خاریجی علاقه‌لر کمیته‌سین‌ده کئچیریلن دینله‌مه‌لرده، ایسلام رسپوبلیکاسی رسمیلرینین ۲۰۱۸-جی ایلده‌ن اعتباراً یاخین شرق‌ده‌کی ترور قروپلاشمالارینا راکتلر چاتدیرماغا باشلادیغینی ادعا ائدیب.

آمریکالی دیپلمات آمریکا قانون وئریجیلرینه «ایرانین راکت پروگرامی ایله باغلی بو یاخینلارادک مخفی معلوماتلاری» تقدیم ائدیب.

او حساب ائدیر کی، ایران اؤتن ایلده‌ن بری بؤلگه‌ده‌کی بعضی ترور قروپلاشمالارینا چوخ سایدا آمریکانین سانکسییالار سیاهیسینا داخیل اولان چوخ سایدا راکتلر چاتدیریب و یالنیز بؤلگه‌ده‌کی ال آلتیلارینا وئریلمه‌سی اوچون راکت سیستملری و مووافیق تکنولوگییالار حاضیرلاماغا داوام ائدیر».

قید ائدک کی، واشینگتن-تهران مناسیبتلری اومان دنیزین‌ده نفت تانکرلریه هجومدان و آمریکایا مخصوص جاسوس درونونون ایران طرفین‌دن وورولماسیندان سونرا، بونون آردیندان ایسه آمریکانین ایسلام رسپوبلیکاسینی گناهلاندیردیغی سعودییه عربیستانینین نفت اوبیکتلرینه ائدیله‌ن هجوم‌دان سونرا داها دا گرگینلشیب.

آمریکا-ایران علاقه‌لرینین پیسلشمه‌سی پروسسی دونالد ترامپ-این حاکمیته گلیشین‌دن سونرا باشلاییب. آمریکا پرزیدنتی اؤتن ایلین مایین‌دا نووه سازیشین‌دن چیخماقلا، ایرانی رگیونال ثابتلیگی پوزماق‌دا و گلوبال تروریزمه دستک وئرمکده اتهام ائدیر. اتهاملارا جواب اولاراق ایران لیدرلری واشینگتنون تضییقلری قارشی‌سین‌دا تسلیم اولمایاجاقلارینا و اؤز مستقیل سیاسی کورسلارینی داوام ائتدیرمه‌یه سؤز وئریب.