شرقی آذربایجان والیلیینین سیاسی مسئله‌لر اوزره بؤلومونون ری‌سی تورکییه جمهوریتی ایله ایران و شرقی آذربایجان ایالتی آراسین‌دا توریزم و اقتصادی علاقه‌لرین داها دا اینکیشاف ائتمه‌سینی ایسته‌ییب.

آخار. آذ خبر وئریر کی، مرتضی محمدزاده بو باره‌ده اوکتیابرین ۱۷-ده تورکییه‌نین تبریزده‌کی باش کونسولو حسین گونگؤرون شرقی آذربایجان شهرلرینین ایجرا حاکمیتی باش‌چیلاری ایله بیرگه کئچیردیی ایجلاس‌دا چیخیش ائدیب.

«شرقی آذربایجان ایالتی ایران‌دا اقتصادی قوتبلردن بیری‌دیر. آراز آزاد تیجارت زوناسینین دا بو ایالت‌ده یئرلشمه‌سی و تورکییه‌یه اولدوقجا یاخین اولماغیمیز بیزه ایمکان وئریر کی، ایکی اؤلکه آراسین‌دا اقتصادی علاقه‌لری اینکیشاف ائتدیرمکده خصوصی رول اوینایاق.»- دئیه او بیلدیریب.

والی‌لیک رسمی‌سی سؤزلرینین داوامین‌دا شرقی آذربایجانلا تورکییه آراسین‌دا توریزم علاقه‌لرینین داها دا اینکیشاف ائتدیریلمه‌سینی ایسته‌ییب. «ایالتیمیزده بونون اوچون بؤیوک پوتنسیال وار. حساب ائلییرم کی، پوتنسیال ایمکانلاریمیزی تانیتدیرماقلا شرقی آذربایجانی سئچن تورکییه‌لی توریستلرین سایی دا آرتاجاق.»- دئیه او علاوه ائدیب.

تورکییه‌نین تبریزده‌کی باش کونسولو حسین گونگور ده ایکی اؤلکه‌نین موختلیف بؤلگه‌لری آراسین‌دا تیجارت علاقه‌لرینین اینکیشاف ائتمه‌سینه ترفدار اولدوغونو وورغولاییب.

«بیز علاقه‌لریمیزده بیر-بیریمیزین تجروبه‌سین‌دن ایستیفاده ائدیب و یاخشی ایشلریمیزی اینکیشاف ائتدیرملیگیک. ائله ایشلر گؤرملیگیک کی، هر ایکی اؤلکه‌نین خئییرینه اولسون. حساب ائلییرم کی، تورک ایش آداملارینی شرقی آذربایجان شهرلرینین پوتنسیال اقتصادی ایمکانلاری ایله تانیش ائتمک لازیم‌دیر. یالنیز بو شکیل‌ده گله‌جک‌ده اقتصادی علاقه‌لریمیزین اینکیشافی اوغروندا مثبت آددیم آتماق مومکون‌دور.»-دیه باش کونسول قئید ائدیب.

ایجلاس‌دا مرند، بیناب (بین ائو) و بستاناباد شهرلرینین ایجرا حاکمیتی باشچیلاری تمثیل ائتدیکلری منطقه‌لرین پوتنسیال تیجارت و اقتصادی ایمکانلارین‌دان سؤز آچیبلار. قرارا آلینیب کی، آدینی چکدییمیز شهرلرین ایش آداملاری ایله تورکییه‌لی یاتیریم‌چیلارین آراسین‌دا بیرگه توپلانتی کئچیریلسین.