ایران آذربایجانینین موغان بؤلگه‌سین‌ده خریستیان‌لیق تبلیغاتی آپارماق‌دا اتهام ائدیله‌ن بیر وطنداش ایرانین تهلوکه‌سیزلیک و امنیت پولی‌سی طرفین‌دن حبس ائدیلیب.

آخار. آز خبر وئریر کی، اردبیل ویلایتین‌ده فالیت گؤستره‌ن «ساوالان خبر» و «آران موغان» کیمی اینتئرنئت پورتاللاری پولیس قورومونون بو باره‌ده وئردیی معلوماتی یاییب.

«تهلوکه‌سیزلیک و امنیت پولی‌سی پارساباد-موغان‌دا بیر سیرا مورککب کشفیات فعالیتلری آپاراراق، خریستان‌لیغی یایماق و تبلیغ ائتمکله مشغول اولان بیر شخصی نظارت آلتینا آلیبلار،» ساوالان خبر سایتین‌دا درج ائدیلیب.

ایران-آذربایجان سرهددین‌ده یئرلشه‌ن پارساباد شهرین‌ده ساخلانیلان شخ‌سین «الده ائدیله‌ن دلیللر و سندلر ایله برابر» محکمه قورومونا تسلیم ائدیلدیی بیلدیریلیب.

بئینلخالق اینسان حاقلاری قوروملارینین هئساباتلارینا اساساً، ایران حاکمیتی دینی و ائتنیک آزلیقلاری اینانجلاری و کیم‌لیکلری اوزون‌دن آشاغیلاییب، حبس ائدیب و حتی اؤلومله جزالاندیریب.

ایران آذربایجانی و ایرانین دیگر بؤلگه‌لرین‌ده یاشایان تورکلرین اکثریتی شیعه‌دیر، آنجاق دیگر اینانجلارا منسوب اولان توپلوملار، او جمله‌دن، اهلی-حاق/الویلر، سوننیلر، بهاییلر و خریستیانلارین دا سایی آز دئییل.

حقوق مدافعه‌چیلری ایران آذربایجانی و اؤلکه‌نین دیگر بؤلگه‌لرین‌ده یاشایان قئیری-شیعه تورکلرین هم ائتنیک، هم ده دینی آیری-سئچکی‌لییه معروض قالدیغینی بیل‌دیریرلر.