مسکوادا ۱۰ ایولدا کؤرفز امکداشلیق شوراسینا عضو اؤلکه‌لرین بیاناتیندا مباحثه‌لی ابو موسی، بؤیوک تنب و کیچیک تنب آدالاری ایله باغلی بیرلشمیش عرب امیرلیکلری-نین مؤوقعیینین دستکلنمه‌سینه روسیانین دا قوشولماسیندان حیدتلنه‌ن ایران آرتیق حربی ریتوریکایا کئچیب.

Axar.az خبر وئریر کی، ۱۲ ایول‌دا روسیا سفیرینی خارجی ایشلر ناظیرلیینه چاغیراراق، مسکوانین مؤوقعیینه اعتراض ائد‌ن، بو آدالارین ایرانین آیریلماز ترکیب حصه‌سی اولدوغونو بیلدیرن تهران بوتون آی عرضینده سیاسی تضییقلرینی داوام ائتدیردی. سپاه کماندیرینین خبردارلیغیندان سونرا ایسه ایران خارجی ایشلر ناظری حسین امیر عبداللهیان ۱۸ ایولدا اوکراینانین اراضی بوتؤولویونو تانیدیقلارینی بیر داها اعلان ائد‌رک، بونون «روسیادان قصاص آلماق» اولدوغونا دا دولاییسی ایله اشاره ووردو.

آی عرضینده «روسیانین تارخ بویو ایرانا خیانت ائتدیی» باره‌ده تهران رسمیلرینین آچیقلامالارینین آردیندان بو گون سپاه «آدالارین تهلوکه‌سیزلیینین تامینی» مقصدیله کؤرفزده، ابو موسی آداسینین یانیندا تعلیملره باشلاییب.

تعلیمین «ایرانین اراضی بوتؤولویونون قورونماسی» شعاری ایله کئچیریلمه‌سی ده دقت چکیر. بئله کی، ایران روسیایا خبردارلیغیندا اراضی بوتؤولویونون قیرمیزی خط اولدوغونو بیلدیرمیشدی.

تعلیملر زمانی سپاه ۶۰۰ کیلومتر منزللی راکتلرله تجهیز ائدیلن یئنی کاترلرینی ده نمایش ائتدیریب.

ماراقلی‌دیر کی، روسیا خارجی ایشلر ناظیرلیی باشچی‌سی سرگی لاوروو آنلاشیلمازلیق اولدوغونو بیلدیررک، ایرانلی همکاری ایله تلفونلا دانیشمیش و آچیقلاما ایله چیخیش ائتمیشدی. آنجاق تهران بو آچیقلامانین «قانع‌ائدیجی اولمادیغینی» بیلدیررک، ریتوریکاسینی قطعیا یومشالتمادی. بو گون ایسه تعلیملرله آچیق شکلده روسیایا مساژ وئرمک قرارینا گلیب.

بعضی ادعالارا گؤره، اوکراینا محاربه‌سینه باشی قاریشان و بو باتاقلیق‌دا جدی ضعیفله‌ین روسیانین حاضرکی دوروموندان ایران ماکسیموم استفاده ائد‌رک، کرملله علاقه‌لری گرگینلشدیرمکده، عوضینده غربله سؤودلشمه‌یه گئتمکده ماراقلیدیر.