ایرانین ارمنستان‌داکی سفیری مهدی سبحانینین ایروان‌دا کئچیردیی مطبوعات کنفرانس‌یندا سسلندیردیی «ایران دهلیز منطیقی چرچیوه‌سینده ارمنستان اراضی‌سیندن کئچن ایسته‌نیله‌ن یولون علیهینه‌دیر» آچیقلاماسی چالیشدیغی اؤلکه‌نین باش ناظری نیکول پاشینیانا خبردارلیق مئساژی داشیییر. تهران گؤرور کی، نیکول پاشینیان زنگزور دهلیزی ایله باغلی آذربایجانلا راضیلاشمانین یوللارینی آختاریر. ایران‌داکی محافظه‌کار قوه‌لر ایسه پاشینیانی دوردورماق اوچون سفیرلرینه ایروان‌دا مطبوعات کنفرانسی کئچیرمک تعلیماتی وئریبلر.

Axar.az خبر وئریر کی، بو سؤزلری پولیتولوگ الخان شاهین‌اوغلو قید ائدیب.

«سفیرین «بؤلگه اؤلکه‌لری آراسیندا ایران یگانه اؤلکه‌دیر کی، زنگزور دهلیزی مسئله‌سین‌ده ارمنستانین موقعینی مدافعه ائدیر» جمله‌سی ایسه روسیایا مساژدیر. معلوم‌دور کی، روسیا زنگزور دهلیزینین اؤز نظارتی آلتیندا ایشه دوشمه‌سینی ایستییر. تهران بونون دا علیهینه‌دیر. تهران زنگزور دهلیزینه اعتراض ائدرکه‌ن، دهلیزین ایران‌دان کئچمه‌سی لاییحه‌سینی دستکلییر. بونو ایرانین ارمنستان‌داکی سفیری ده تصدیق ائدیب. اما ارمنی ژورنالیستلردن هئچ بیری اونا سوال وئرمه‌ییب کی، ارمنستان‌دان کئچن دهلیزین علیهینه اولدوغونوز حال‌دا، نئجه اولور عینی مارشروتلا ایران‌دان کئچن دهلیزین رئاللاشماسینی دستکلییرسیز؟» – پولیتولوگ بیلدیریب.