بو گون مسکوانین اوکراینایا قارشی تجاوزونو آزالتماق اوچون چوخ آز ایستیمولو وار، عکسینه، ولادیمیر پوتین اؤزونو حربی غلبه‌یه یاخین حس ائده بیلر.

Axar.az خبر وئریر کی، بو باره‌ده آ.پ-نین آراشدیرماسیندا بیلدیریلیب.

قید اولونوب کی، روس قوشونلاری جبهه‌ده داواملی ایرلیلییش الده ائدیر، روسیا اقتصادیاتی هله چؤکمه‌ییب و مخالفلره قارشی رپرسیالار پوتینی محاربه‌نی بیتیرمه‌یه تشویق ائده بیله‌جک هر هانسی داخلی تضییقی آرادان قالدیریر:

"فینلاندییانین کئچمیش پرزیدنتی ساولی نینیسته قید ائدیب کی، پوتین سیستملی دوشونور، ترامپ ایسه ایش آدامی کیمی داوراناراق تئز حل یوللارینا جان آتیر. اونا گؤره ده بو ایکی‌سی یقین کی، هئچ واخت راضیلیغا گله بیلمه‌یه‌جک. عکسینه، پوتین یاواش-یاواش روسیانین حربی مؤقعلرینی گوجله‌ندیرمه‌یه، هم کیئوین، هم ده غربین سیاسی اراده‌سینی ضعیفلتمه‌یه داوام ائد‌جک".

روسیالی سابق دیپلمات بوریس بوندارو ایسه بیلدیریب کی، پوتین ترامپین اوکرایناداکی محاربه‌دن یورولماسینا و دقتینی باشقا مسئله‌لره یؤنلتمه‌سینه امید ائدیر.

بؤیوک بریتانیانین روسیاداکی کئچمیش سفیری لوری بریستوو وورغولاییب کی، روسلارین دانیشیقلارا گیرمه‌سی هله ده رئال کمپرومیسلره حاضر اولماق دئمک اولمایاجاق. اونون سؤزلرینه گؤره، روسیانین دانیشیقلار استراتگییاسی بئله گؤرونور: «منیم اولان منیم‌دیر، سیزینکی ایسه دانیشیقلارین موضوعسودور».