نوبل صلح مکافاتی لاورئاتی و انسان حقوقلاری مدافعه‌چیلری آسوسیاسییاسینین رهبری، آذربایجان اصیل‌لی شیرین عبادی ایران پارلامنتینین غیری-فارس دیللرین محدود شکیل‌ده تدریسی ایله باغلی منفی قرارینا اعتراض ائدیب.

Axar.az خبروئریر کی، بو باره‌ده او اؤزونون سوسیال مئدیا حسابیندا پایلاشیم ائدیب.

"بلوچستان‌دان آذربایجانا، خراسان‌دان خوزستانا قدر انسانلار مثبت و قارشی‌لیق‌لی علاقه‌ده اولدوغو حال‌دا، حاکمیت اراضی بوتؤولویونو و بیرلییی قوروماق آدی ایله نفرت و تفرقه توخومو سپیر»،- عبادی یازیب.

او، ایران حاکمیتینین باشقا دیللره قارشی منفی مناسیبتینی اؤلکه‌نین بوتولویو آدی آلتیندا آپاردیغینی دئییب، تهران رژیمینین ۴۶ ایلدیر غیری-فارس دیللرره و مدنیتلره قارشی آیری-سئچکی‌لیک و باربارلیق سیاستی یوروتدویونه دقت چکیب.

«ایران سیویل خالقلارا، زنگین مدنیتلره و دیللره مالک چوخ ملت‌لی اؤلکه‌دیر و بو چوخ ملت‌لی‌لییه محل قویماماق بو گونه کیمی بیر چوخ سوسیال، مدنی و اقتصادی بحرانلارا سبب اولوب"،- او وورغولاییب.

آذربایجان‌لی حقوق مدافعه‌چی‌سی ایران حاکمیتینی سپاراتیزمله مباریزه آدی آلتیندا تورکلر، بلوچلار، عربلر، کوردلر و باشقا خالقلارا قارشی هم ده مدنی رپرسییالارا ال آتدیغینی قید ائدیب و ایران پارلامنتینی آیری-سئچکی‌لییه سؤیکه‌نه‌ن قرارینا گؤره سپاراتیزمه زمین یاراتماق‌دا گناهلاندیریب.

"بعضی آنالیتیکلر ادعا ائدیرلر کی، آنا دیلینده تدریس، حتی اوشاق باغچالاریندا بئله آنا دیلینین اؤیرنیلمه‌سی فارس دیلینین زده‌له‌نمه‌سینه گتیریب چیخاراجاق. بو یاناشمانی مدافعه ائد‌نلره بیر آز تاریخ اوخوماغی توصیه ائدیره‌م. غزنویلر، صفویلر و قاجارلار دؤورونده فارس دیلی یوخ اولدو؟. فارس دیلی موغوللار دؤورونده ده محو ائدیلمه‌دی، آنجاق اسلام رسپوبلیکاسی یانلیش سیاستلری ایله بونا نایل اولاجاق"،- شیرین عبادی علاوه ائدیب.

قید ائدک کی، اصلن همدان‌دان اولان و خاریج‌ده مهاجرت‌ده یاشایان شیرین عبادی ۲۰۰۳-جو ایلده نوبل صلح مکافاتینی آلیب.

او، ۲۰۱۲-جی ایلده ده، ایران‌دا انسان حاقلاری و اونلارین اساس آزادلیقلاری اوغروندا گؤستردیی فعالیته گؤره، آوروپا پارلامننتی طرفیندن آندری ساخاروو آدینا "دوشونجه آزادلیغینا گؤره" مکافاتی ایله تلطیف اولونوب.